ಮಿಲನ

ಮಣ್ಣಿನೊಳಗಣ ಸಾರದಂತೆ ನನ್ನ ನಿನ್ನೀ ಮಿಲನ |

ನೀರನೊಳಗಿನ ಮೀನಿನಂತೆ ನನ್ನ ನಿನ್ನೀ ಮಿಲನ ||

ಬೆಳಕಿನೊಳಗಿನ ಜ್ಯೋತಿಯಂತೆ ನನ್ನ ನಿನ್ನೀ ಮಿಲನ |

ಗಾಳಿಯೊಡಲಿನ ತಂಪಿನಂತೆ ನನ್ನ ನಿನ್ನೀ ಮಿಲನ ||

ಗಗನದೊಳಗಿನ ಶೂನ್ಯದಂತೆ ನನ್ನ ನಿನ್ನೀ ಮಿಲನ |

ಪಂಚಭೂತ ತತ್ವದಂತೆ ನನ್ನ ನಿನ್ನೀ ಮಿಲನ || 

ಫಲದ ತುಂಬು ಮಾಗಿದಂತೆ ನನ್ನ ನಿನ್ನೀ ಮಿಲನ |

ಬೇರ ತುಂಬಾ ಸತ್ವದಂತೆ ನನ್ನ ನಿನ್ನೀ ಮಿಲನ ||

ಜೇನ ಹನಿಯ ಮಧುರದಂತೆ ನನ್ನ ನಿನ್ನೀ ಮಿಲನ |

ಹೂವು ಹಿಡಿದ ಗಂಧದಂತೆ ನನ್ನ ನಿನ್ನೀ ಮಿಲನ ||

ಮಂಜಿನೊಳಗಣ ಬಿಸಿಲಿನಂತೆ ನನ್ನ ನಿನ್ನೀ ಮಿಲನ |

ಕುಂಚದೊಳಗ ಚಿತ್ರದಂತೆ ನನ್ನ ನಿನ್ನೀ ಮಿಲನ ||

ಜನ್ಮಗುಟ್ಟು ಬೇಡದಾದ ನನ್ನ ನಿನ್ನೀ ಮಿಲನ | 

ಅನುರಾಗ ಮಿಳಿತದೊಳಗೆ ನನ್ನ ನಿನ್ನೀ ಮಿಲನ ||

ಆಸೆ ತಂದ ಮೋಡದಂತೆ ನನ್ನ ನಿನ್ನೀ ಮಿಲನ |

ಹೃದಯ ಮೀಟಿದಂಥ ಹಾಡು ನನ್ನ ನಿನ್ನೀ ಮಿಲನ ||

ಬಣ್ಣಧರ್ಮಜಾತಿ ಇರದ ಪ್ರಕೃತಿಕರುಣ ಚಲನ |

ಗಂಡುಹೆಣ್ಣು ಮಿಲನದೊಳು ವಿಶ್ವಜೀವ ನಿಯಮ ||