ಮುಂಗಾರು ಮಳೆ

ಮುಂಗಾರಿನ ಮಳೆಯಲ್ಲಿ ಜಿಗಿದಾಡಿದ ನೆನಪು

ಸಿಗದ ಆಲಿಕಲ್ಲಿಗೆ ಬಟ್ಟಲು ಹಿಡಿದು ಹುಡುಕಾಡಿದ ನೆನಪು

ಗಾಳಿಯ ಅಬ್ಬರಕ್ಕೆ ಛತ್ರಿ ಮುರಿದುಕೊಂಡು ಬಂದ ನೆನಪು

ಮೊದಲ ಮಳೆಗೆ ನೆನೆದ ಮಣ್ಣಿನ ಸುವಾಸನೆಗೆ

 ಮೈ ಮರೆತು ನಿಂತ ನೆನಪು

ಮುಂಗಾರಿನ ಸಿಂಚನಕೆ ಮನ ನವಿಲಾಗಿ

ಅಂಗಳದ ತುಂಬೆಲ್ಲ ಕುಣಿದಾಡಿದ ನೆನಪು

ಸಾಲು ಸಾಲಾಗಿ ಪುಟ್ಟ ಪುಟ್ಟ ಕಾಗದದ ದೋಣಿಗಳನ್ನು ಮಾಡಿಬಿಟ್ಟ ನೆನಪು

ಗಗನಕ್ಕೆ ವದನ ತಾಕಿಸಿ ನಿಂತು

ಚಿಟಪಟ ಮಳೆಯ ಹನಿಗಳು ಮುಖದ ಮೇಲೆ ಬಿದ್ದಾಗ ಕಚಗುಳಿ ಇಟ್ಟಂತಾಗಿ ನಕ್ಕ ನಲಿದಾಡಿದ ನೆನಪು

ಭಾರಿ ಮಳೆಗೆ ಬಿದ್ದ ಮಾವಿನಕಾಯಿಗಳನ್ನು ಕದ್ದು ತಂದು ತಿಂದ ನೆನಪು

ಮಳೆ ನಿಂತರೂ ಮರದ ಹನಿ ಹೇಗೆ ನಿಲ್ಲುವುದಿಲ್ಲವೋ

ಹಾಗೆಯೇ ಬಾಲ್ಯ ಹೋದರೂ ಬಾಲ್ಯದ ನೆನಪು ಮಾಸುವುದಿಲ್ಲ

ನೆನಪುಗಳ ನೆನಪೇ ಮಧುರ

ನೆನಪುಗಳ ಭಾವ ಎಂದಿಗೂ ಅಮರ