ಪ್ರವೇಶ ನಿಷಿದ್ಧವೆಂದರು;

ಅರೆಬೆತ್ತಲೆ ಮೈಯ ಸವೆಸಿ

ಬೆವರನಿಳಿಸಿ ದುಡಿದ ನಿನಗೆ

ಆಗಾಗ ಒಂದಿಷ್ಟು ಬ್ರಾಂದಿ

ಉಪ್ಪಿನಕಾಯಿ ನೆಕ್ಕಿಸಿ

ಕಟ್ಟಿಸಿಕೊಂಡ ಗುಡಿಗೆ

ಪ್ರವೇಶ ನಿಷಿದ್ಧವೆಂದರು

ಒಂದೊತ್ತಿನ ಗಡದ್ ಊಟ 

ಖರ್ಚಿಗಷ್ಟು ಪುಡಿಗಾಸು

ಕೊಟ್ಟರೆ ನಿನ್ನ ಕೆಲಸ 

ಹೊತ್ತು ಮೀರಿ ಮುಂದೋಗುವುದು

ದೇವಸ್ಥಾನ ಅಲ್ಲವೆ ಎಂದು..

ಆದರೂ ಪ್ರವೇಶ ನಿಷಿದ್ಧವೆಂದರು

ಕಂಬ ಹೊತ್ತು ಬಾಗಿದ ಬೆನ್ನು 

ಬೊಕ್ಕೆ ಏಳುವಂತೆ ಹೇಗಿದ

ಕೈಗಳು ಬೆಚ್ಚನೆ ಕುಳಿತ

ಕಲ್ಲಿನ ಬಳಿ ಕೈ ಮುಗಿಯಲು

ಬಂದರೆ ಬೈದು ಅಟ್ಟುವರು

ಪ್ರವೇಶ ನಿಷಿದ್ಧವೆಂದರು

ಹುಂಡಿ ಕಾಸಿಗಿಲ್ಲದ ಮೈಲಿಗೆ

ಮಂಗಳಾರತಿ, ತೀರ್ಥ ಪ್ರಸಾದಕ್ಕಿದೆ

ಈ ಅಜ್ಞಾನಿಗಳ ಲೋಕದಲ್ಲಿ 

ನೆರಳು ಕೊಟ್ಟು ತಂಪನೀವ

ನಿನ್ನನ್ನೇ ಸುಡುವ ಸೂರ್ಯನತ್ತ ತಳ್ಳಿ

ಪ್ರವೇಶ ನಿಷಿದ್ಧವೆಂದರು

ವರುಷವೆಲ್ಲಾ ದಂಡಿಸಿದ ದೇಹಕ್ಕೆ

ದೇವರ ದಯೆಯೂ ಇಲ್ಲ

ದಾರಿದ್ರ್ಯವಂತೂ ತಪ್ಪಿಲ್ಲ

ಕಲ್ಲು ಗುಡಿಯ ಕಟ್ಟಿ ಕೊಳ್ಳೆ

ಹೊಡೆವವರಿಗಿಲ್ಲದ ಮಡಿ

ನಿನಗೆ ತಂದು ಪ್ರವೇಶ ನಿಷಿದ್ಧವೆಂದರು