ಸಾಗಿಹೆಯೇಕೆ ಬಲುದೂರ ತೊರೆದು?
ಸಾಗಿಹೆಯೇಕೆ ಬಲುದೂರ ತೊರೆದು?
ಆರಂಭಿತ ರೇಖಾರಶ್ಮಿಯ,
ಅನಾರಂಭಿತ ಪಥದಾಯ್ಕೆ,
ಅನುವಾದಿಪ ಭಾವಗಳನಾದುವಾದಿಪ,
ಅನುಭಾವಗಳ ಕೋರಿದಂತೆ.
ಮುನ್ನಡೆದ ಹೆಜ್ಜೆಗಳ,
ನೆರಳ ಗುರುತು ಮರಳಿ,
ಕ್ಷಣಕಾಲ ಕಥೆಗೆ ತೆರಳಿ,
ನಿನ್ನಾಗಮನಕೆ ಕಾದಂತೆ.
ಕರಸೋಕಿ ಜಾರಿಹ,
ಕಡುಗಂಬನಿಗೆ ಕೊರಗಲೇಕೆ?
ಕಡಲಂಚಿನಲಿ ಮರೆಯಾದ,
ಕಡೆಯ ಹನಿಗೆ ಕೊಡೆಯಾದಂತೆ.
ಮಾತಿಗೆ ಮೊದಲಾದ ಯೋಚನೆ,
ರಾಗಕೆ ಮೊದಲಾದ ಸ್ವರ,
ತಾಳಕೆ ಮೊದಲಾದ ಸಂಗೀತದಂತೆ,
ಎನ್ನುಸಿರಿಗೆ ಮೊದಲಾಗಿ, ನೀ ಮೌನಿಯಾದಂತೆ.
ತೀಡಿದಂತೆ ಮೂಡುವ ಅಕ್ಷರ,
ಬರೆದಂತೆ ಸಾಗುವ ಬಾಳ ಪುಟಗಳಲಿ,
ಶುರುವಾದ ಕಾವ್ಯಕೆ ಮುನ್ನುಡಿ ಬರೆದು,
ಸಾಗಿಹೆಯೇಕೆ ಬಲುದೂರ ತೊರೆದು?