എന്റെ വീട്
എന്റെ വീട്
സ്വന്തബന്ധങ്ങളെയെല്ലാം
കാത്തിരിക്കുന്നൂ
എന്റെ വീട് നിസ്വാർത്ഥമായ
സ്നേഹസമ്മാനങ്ങളെയും കാത്ത്,
ഒരിക്കലെങ്കിലും ഇനിയുമുണരണം
ഉയർന്ന ചിരികളുടെയും
സന്തോഷത്തിന്റെയും ദിനങ്ങൾ
സ്വപ്നസദൃശമായ എന്റെ വീട്ടിൽ..
മരിച്ചുപോയ തലമുതിർന്നവരുടെ-
യടക്കമില്ലാച്ചിരികൾ നഷ്ടമായൊരാക്കാലത്തേക്കുറിച്ചു
പറയവേ, ഞാനുമെന്റെ തലമുറയും
അടക്കിപ്പിടിച്ച മൗനത്തോടെയാ
ചിരികൾക്കുപിമ്പേയോടീടുന്നു
ഇപ്പോഴെന്റെ വീട്ടിൽ..
അവധിക്കാലങ്ങളുടെ സന്തോഷ
സന്നിവേശത്തിൽ
എന്റെ നടുമുറ്റമുള്ളൊരുവീട് പല വർണ്ണങ്ങൾ
നിറഞ്ഞൊരു പൂവാടിയായിത്തീർന്നീടുവാൻ
കൊതിച്ചീടുന്നൂവെപ്പോഴും,
ഞാനുമെൻ ഗൃഹാതുരത്വങ്ങളും
നിറഞ്ഞ കൂടിച്ചേരലുകൾക്കായ്
കാത്തിരിക്കുന്നൂവെപ്പോഴും..
ചിലനേരം,മനസ്സുകൈവിട്ടുപോകു-
മോയെന്ന ഭയാശങ്കയിൽ ഭയന്നങ്ങൊളിച്ചിരിക്കാറുണ്ട്
എന്റെ ചിന്തകളെല്ലാം,
മഹാമാരി വന്നു തിമിർത്തോരാക്കാലത്തിൽ കൂടണയാപക്ഷികളെത്തേടി
ഞാനുമെൻ മനവും അങ്ങകലേക്കു കണ്ണുംനട്ടുകാത്തിരിക്കാറുണ്ട്
ഏകാന്തമായ്
വീടിന്നകത്തളങ്ങളിൽ..