പല്ലി
പല്ലി
ഇന്ന് ഞാൻ ഒരു പല്ലിയെ കണ്ടു
ഒരു കുഞ്ഞൻ പല്ലി
വാലിൽ കുഞ്ഞൻ പുള്ളി
നിറഞ്ഞൊരു കുറുമ്പൻ
ഈ ഫ്ലാറ്റ് ജീവിതം
തുടരുമ്പോൾ
എവിടെ കാണും
ഞാൻ ഒരു പല്ലിയെ?
ഞാൻ ഓർത്തു
വർഷങ്ങൾക്കു മുൻപ്
പഠിച്ച പല്ലി പാഠങ്ങൾ
എന്റെ ജന്തുശാസ്ത്രക്ലാസ്
ഫൈലം: കോർഡാറ്റ
ക്ലാസ്: റെപ്പ്റ്റിലിയ
സൂപ്പർ ഓർഡർ : ലെപ്പിഡോസോറിയ
ഹോ ! ഇവൻ ആളൊരു കേമൻ തന്നെ
എത്ര വിഭാഗങ്ങൾ
എത്ര സവിശേഷതകൾ
അന്നത്തെ കൌതുകം
നിറഞ്ഞ മനസ്സ്
ഇന്നും എന്നിൽ
തെളിഞ്ഞു വന്നു
“ഒന്ന്, നിൽക്കാമൊ
പല്ലി കുഞ്ഞേ “
“എന്തിനാ ?”
“അല്ല, നീ ഇവിടേം ഉത്തരം താങ്ങി ആണോ”
“പിന്നെ, എന്താ സംശയം?
“പല്ലികുഞ്ഞേ , നിനക്കു സത്യമിടാൻ
അറിയുമോ”
“ഇല്ല , പഠിക്കുന്നേ ഉള്ളൂ”
“ഞാൻ പോകട്ടെ, ഈ ഫ്ലാറ്റുകളിൽ
പൊടിയൻ ഈച്ച ഇല്ല”
“ശരി , പിന്നെ കാണാം അല്ലേ”
“നിൽക്കൂ , ഒരുകാര്യം കൂടി
നിന്നെ പറ്റി ഞാൻ എല്ലാം പഠിച്ചിട്ടുണ്ട്
എന്റെ ക്ലാസ്സിൽ”
പല്ലി കുഞ്ഞ് ചിരിച്ചു , കൂടെ ഞാനും ..