माय मराठी
माय मराठी
माय मराठीचा नाद
जसा अमृतघट वर्षतो
तृप्त होऊनिया मनी
जीव आनंदाने हर्षतो
राज्यभाषेचा गुलदस्ता
शब्दगंधातुनी बहरतो
मायमराठीचा बाणा
व्याकरणातुनी मोहरतो
श्लोक ओव्या अभंगातुनी संतांच्या
राजभाषेचा गोडवा विहरतो
गवळण, पोवाडे, भारुडातुनी
प्रबोधनाचा वेलू बहरतो
मायबोली साहित्याचा झरा
शब्दा-शब्दातुनी वाहतो
आमच्या सारखे नशिबवान आम्हीच
जे नऊ रसात तृप्त नाहतो
काना-मात्रा, वेलांटी, अनुस्वार
आकारा -उकारात सजतो
समृद्धभाषेचा मान
माझ्या मराठीस लाभतो
कथा-कादंबऱ्या, कविता, गझल
राजभाषेची विविध रूपे सजवितो
प्रत्येकाच्या मना-मनात
भाषेचा अभिमान जागवितो
माझ्या मायबोलीचा गंध
शब्दसुमनांतुनी दरवळतो
अव्यक्त भावनेतील भाव
मग लेखणीतूनही सळसळतो