वंशाचा दिवा
वंशाचा दिवा
आस दिव्याची तू धरु नको
आई मला गर्भात मारु नको ---|| धृ ||
लाथळल्या लाथा खाईन मी
कर्माचे भोग भोगीन मी
नको आई तू घेऊ गं बळी
उमलु दे गं नविन कळी
कळीस कोवळया खुडू नको ---- ||१ ||
उद्याची मी घेईन गं हमी
नाही पडनार तुला गं कमी
क्रुरपणाचा कर तू त्याग
फुला फळाणी बहरेल बाग
चिंता उद्याची करूनको------ ||२||
स्वप्न माझे होऊ दे साकार
जगाण्याचा मज दे अधिकार
सत्याचा तू कर गं विचार
राग तुझा गं होईल दुरं
त्याग माझा तू करू नको ---- || 3 ||
पणती दिव्याचा सम प्रकाश
का मग दिव्याची धरते आस
वंशाचा दिवा करीन का सेवा
काशीला तुजला नेईल का तेव्हा
मनी भाव तू आणू नको -------- || ४||
आभाळागत तुझी गं छाया
सागरा समान तुझी गं माया
जन्मा आधी तू मारती कशाला
नस्ता पाप तू करती कशाला
धन दौलत मज काही नको ----||५||