ଅଭିଯୋଗ
ଅଭିଯୋଗ
ଅଭିଯୋଗ କଣ ବା କରିବି
କାହା ଆଗରେ କି କାହା ପାଇଁ କରିବି
ଏମିତି ଆଲୁରୁ ବାଲୁରୁ ପ୍ରଶ୍ନ ସବୁ
ନିଦ ସହିତ ପୁଣି ନିଜ ସହିତ
ଝଗଡା କରି କଳିହୁଡି ସାଜି ସାରିଥିଲେ ।
ମନ ବି ଲୁଣା ପାଣିର ଘେରି ଭିତରେ
ମଧୁରତା ସ୍ପର୍ଶ ପାଇଁ ଆକୁଳ ହୋଇ ଯାଉଥିଲେ ।
ଅନାବନା ଭାବନା ଯେବେ ପରଳ ଭିତରୁ
ଝାଡିଝୁଡି ହୋଇ
ବାସ୍ତବ ଜଗତକୁ ଫେରିଲେ
ମୁଁ ବି ପ୍ରକୃତିସ୍ଥ ହୋଇସାରିଥିଲି ।
ଓଃ ! ଦେହ ଲାଲ୍ ରଙ୍ଗରେ
ରଙ୍ଗେଇ ହୋଇସାରିଛି
ତା' ସହିତ ଭାରାକ୍ରାନ୍ତ ମୁଣ୍ଡ
କିଛି ଅଭିଯୋଗର ଭାରକୁ ନେଇ
ଅଭିଯୋଗର କାଠଗଡାରେ
ଠିଆ ହୋଇଛି ।
ଧାରା ଉପରେ ଧାରା ଖୁନ୍ଦି ଖୁନ୍ଦି ଦିଆ ଚାଲିଛି
ଜେରା ପରେ ଜେରା ଏମିତି ଅନେକ।
ରାୟର ଅପେକ୍ଷା ବ୍ୟଥିତ କରୁଛି ।
ଶୁଣାଣୀ ଆସିଗଲା
ଅଭିଯୋଗର ଜଉ ଘରେ ନିଜକୁ
ଜୀବନ୍ତ ଦଗ୍ଧ କରିବା ପାଇଁ ।
କେଜାଣି
ଏତେ ସବୁ ଅଭିଯୋଗ
ଦେହରେ ମିଞ୍ଜିବା ପରେ
ଅନ୍ତଃକରଣରେ ହେଜିବା ପରେ
ଏ ଭାବନା ମାନେ କାହିଁକି
ବୁଢିଆଣୀ ଜାଲ ଭିତରେ
ଗୁଡେ଼ଇ ତୁଡେଇ ହୋଇ
ପୁଣି ସେଇ ଅଭିଯୋଗ ପଛରେ ପଡିଛନ୍ତି
ଏବେ ବି ଏହା ପ୍ରଶ୍ନବାଚୀ ?