"ଅହିଂସାର ପୂଜାରୀ ହେ ବାପୁଜୀ"
"ଅହିଂସାର ପୂଜାରୀ ହେ ବାପୁଜୀ"
ଦେଶ ମାତୃକାର ହେ ବୀର ସନ୍ତାନ
ତୁମେ ହୃଦେ ଚିର ସ୍ମରଣୀୟ,
ଅହିଂସା ପୂଜାରୀ ଦେଉଛୁ ସମ୍ମାନ
ଗାଇ ତୁମ ନାମ ଜୟ ଜୟ ।
ରଘୁପତି ରାଘବ ରାଜା ରାମ ଯେ
ଗୁଞ୍ଜୁଛି ଆଜି ସାରା ଦେଶରେ,
ବାପୁଜୀ ମହାତ୍ମା ନାମରେ ତୁମକୁ
ପୂଜା କରୁଛନ୍ତି ସାରା ବିଶ୍ବରେ ।
ଧନ୍ୟ ଧନ୍ୟ ତୁମେ ଯୋଗ୍ୟତମ ସୁତ
ଧନ୍ୟ ତୁମ ସେହି ପିତା ମାତା,
ଯାହାଙ୍କ କୋଳରେ ଆବିର୍ଭାବ ହେଲ
ଯୁଗ ଜନ୍ମା ତୁମେ ଜାତି ପିତା ।
ଜାତିର ଜନକ ମହାନୁ ଭବକ
ମୋହନ ଦାସ କରମ ଚାନ୍ଦ,
ସତ୍ୟ ଅହିଂସାର ପରମ ପୂଜାରୀ
ଝୁରେ ଆଜି ତୁମକୁ ଜଗତ ।
ଛୁଆଁ ଅଛୁଆଁର ଭେଦଭାବ ଭୁଲି
କହିଲ ସବୁ ଧର୍ମ ସମାନ,
ଅନ୍ଧ ବିଶ୍ବାସକୁ ମନରୁ ପାଶୋରି
ମୁକ୍ତିର ଦେଲ ଦିଗ ଦର୍ଶନ ।
ଏକତା ରଜ୍ଜୁରେ ଭାରତ ବାସୀଙ୍କୁ
ବାନ୍ଧି ରଖିଥିଲ ପରା ତୁମେ,
ଅସଂଖ୍ୟ ଜନତା ଯୋଗ ଦେଇଥିଲେ
ଶାନ୍ତି ଯାତ୍ରାର ମହା ସଂଗ୍ରାମେ ।
ଜାଗରଣ କରି ସଂସ୍କାର ଆଣିଲ
ଦେଶ ପ୍ରେମ ଭରି ହୃଦୟରେ,
ଆଇନ୍ ଅମାନ୍ୟ ସତ୍ୟାଗ୍ରହ ଦେଖି
ବିଦେଶୀ ଥରହର ଭୟରେ ।
ବିଦେଶୀ ଦରବ ବର୍ଜନ କରିଲ
କରି ନିଜ ଦେଶୀ ପ୍ରଚଳନ,
ଗୋରା ସିପାହୀଙ୍କ ଲାଠିମାଡ ସହି
ଭୋଗିଲ କେତେ କାରାବରଣ ।
ଅହିଂସା ନୀତିରେ ଫିରିଙ୍ଗି ହଟାଇ
ସ୍ବାଧୀନ କଲ ଦେଶ ମାଆକୁ,
ଜନ ଗଣ ମନ ସଂଗୀତ ଗାଇଲ
ଆକାଶେ ଉଡାଇ ତ୍ରିରଙ୍ଗାକୁ ।
ସ୍ବାଧୀନତା ଆଣି ଚିର ନିଦ୍ରା ଗଲ
ହେ ତୁମେ ସାବରମତୀ ସନ୍ଥ,
ଶିଖାଇ ଦେଇଗଲ ସାରା ବିଶ୍ଵକୁ
ଅହିଂସାର ମହାମନ୍ତ୍ର ପଥ ।
ହେ ସମୟାନୁବର୍ତ୍ତୀ କର୍ତ୍ତବ୍ୟବୋଧ
ସ୍ବଚ୍ଛ ଭାରତର ପ୍ରତିଷ୍ଠାତା,
ଆଜିର ଏଇ ପବିତ୍ର ଜୟନ୍ତୀରେ
କରେ ସମ୍ମାନ ନୁଆଇଁ ମଥା ।