ଗଛର ମହତ୍ତ୍ୱ
ଗଛର ମହତ୍ତ୍ୱ
ଆସ କୁନା,ମୁନା ,ଟୁନା, ସକଳ
ଲଗାଇବା ଗଛ ହୋଇଣ ମେଳ ।
ଗଛ ପରା ଆମ ପ୍ରକୃତ ମିତ
ଦିଏ ଫୁଲଫଳ ଆମକୁ ସେତ ।
ଅମ୍ଳଜାନ ଦିଏ ବଞ୍ଚିବା ପାଇଁ,
ଅଙ୍ଗାରକାମ୍ଳକୁ ହ୍ରାସ କରଇ ।
ବୃକ୍ଷ ଥିଲେ ଖରା ବାଧଇ ନାହିଁ
ନଥିଲେ ଦିଶଇ ଟାଙ୍ଗରା ଭୂଇଁ ।
ବୃକ୍ଷ ଭରପୂର ପୃଥ୍ୱୀ ସୁନ୍ଦର
ଲାଗଇ ପ୍ରାଣୀଙ୍କୁ ସରଗପୁର ।
ଧରଣୀର ଶୋଭା କରେ ବର୍ଦ୍ଧନ
ଜଳଚକ୍ର ତାର ଅମୂଲ୍ୟ ଦାନ ।
ମୃତ୍ତିକା କ୍ଷୟକୁ ରୋକେ ପାଦପ
ଆମ ପାଇଁ ତାର ମୂଲ୍ୟ ଅମାପ ।
ଗଛ ଦେହେ ଫୁଲ ଫଳ ସମ୍ଭାର
ଦେଖିଲେ ଆନନ୍ଦ ହୁଏ ସଞ୍ଚାର ।
ବୃକ୍ଷ ବିନା ଧରା ଶ୍ରୀହୀନ ଦିଶେ
ଉତ୍ତମ ବରଷା ନ ହୁଏ ଦେଶେ।
ବର୍ଷା ବିନା ହୋଇଥାଏ ମରୁଡି
ପ୍ରାଣୀ ଯାଉଥାନ୍ତି ଦୁଃଖରେ ସଢ଼ି ।
ଜଙ୍ଗଲ ସୁରକ୍ଷା କରିବା ଯେବେ
ବିଶ୍ୱତାପନରୁ ବଞ୍ଚିବା ତେବେ ।
ନ କାଟିବା ଗଛ କରିବା ଯତ୍ନ
ସେହି ପରା ଆମ ଅମୂଲ୍ୟ ରତ୍ନ ।
ଆଜିଠାରୁ ଆମେ ଶପଥ ନେବା
ନିଜ ପିଲା ପରି ଗଛ ପାଳିବା ।।