ମୋ ଶବ୍ଦ

ସାରା ରାତି ଏ ଶବ୍ଦଗୁଡାକ

ଭାରି କଷ୍ଟ ଦିଅନ୍ତି,

ରାତିସାରା କଡ ଲେଉଟାନ୍ତି

ଏକାନ୍ତ ରୁ ଅନନ୍ତ ଯାଏଁ,

'ଅ'କାର ରୁ ଓଁକାର ଯାଏଁ,

ଘୂରି ବୁଲନ୍ତି ବର୍ଣ୍ଣମାଳା ରୁ ବର୍ଣ୍ଣାଳୀ ଯାଏଁ ।

କେତେବେଳେ ଦୂର ତାଳବଣର

ବଣିଟିଏ ପରି,

ତ କେତେବେଳେ ମୋ ବଗିଚାର 

ଚୁଲ୍ ବୁଲ୍ ପ୍ରଜାପତି ହୋଇ

ହାତପାହାନ୍ତାରେ ଧରାଦେଇ ଉଡିଯାନ୍ତି ,

ସେତେବେଳ ଯାଏଁ ,ଯେତେବେଳ ଯାଏଁ

ସେମାନଙ୍କୁ ପୋଷା ମନେଇ

ଭାବରେ ଭାବରେ ଛନ୍ଦି ନ ଦେଇଛି,

ଯେତେବେଳ ଯାଏଁ

ମୋ ଡାଏରୀ ପୃଷ୍ଠାରେ

କଲମର ବେଡି ପକାଇ 

କଏଦ୍ ନ କରିଛି ,

ସତରେ ଭାରି କଷ୍ଟ ଦିଅନ୍ତି ଏମାନେ

ଯେତେବେଳ ଯାଏଁ 

କବିତାର ରୂପ ନ ଦେଇଛି ॥