ପ୍ରତୀକ୍ଷାର କାବ୍ୟ ସ୍ୱର
ପ୍ରତୀକ୍ଷାର କାବ୍ୟ ସ୍ୱର
ଏଇ କ୍ଷଣି ଫେରାଇଦେଉଛି
ତୁମେ ଦେଇଥିବା ସମସ୍ତ ଆୟୁଷ ଏବଂ
ପାଦ ତଳୁ ମାଟି
ମିଛ ମିଛରେ ସ୍ୱପ୍ନ
ମିଛରେ ଆତ୍ମୀୟତା
ମିଛରେ ପୁଣି ଶୂନ୍ୟପଣ
ଯାହା କହୁଛ କୁହ
ମୁଁ କହିବି କେବେଳ
ନିଃସ୍ୱାର୍ଥପର ଭାବର କାନ୍ ଭାସ୍
ମୋତେ ସଂକ୍ରମଣ ହୋଇଛି ଏବେ
ଉଡାଣ ଖୋର ମନ
ଲଙ୍ଘିବାକୁ ହେବ ଅଭେଦ୍ୟ କକ୍ଷ
ଯେଉଁଠି ମିଳିଥିଲା ନିନ୍ଦା ଅପମାନ
ଗୋଟିଗୋଟିକରି ଅଙ୍କ କଷିବାକୁ ହେବ
ସମୟର ଅସମାନତା ଯୁଦ୍ଧରେ
ମିଛର କିଛି ମୂଲ୍ୟ ନାହିଁ ବୋଲି ଯିଏ କହୁଛି
ସେ ତ ଗୋଟେ ବଡ଼ ମିଛ
ମିଛକୁ ମିଛ ପୁଣି ସତକୁ ସତ
ଏ ତ ସମୟର ଆଭାସଚିତ୍ର
ସୃଷ୍ଟି ହେବ ନୁଆଁ ଅଙ୍କର ନୁଆଁ ସରଳାର୍ଥ
ହିସାବନିକାଶ ହେବ ସୁଧ ମୂଳର
ଉଡ଼ିବାକୁ ହେବ କେଉଁ ଗ୍ରହ ଗ୍ରହାନ୍ତର
ଆକର୍ଷଣ ସାଜିବାକୁ ହେବ କେଉଁ ରକ୍ତାକ୍ତ ଫୁଲର
ଯାହାକୁହ ବସନ୍ତ ଆସିଛି ଏସନ
ଯୁଦ୍ଧର ଡାକରା ନେଇ
ସୀମାନ୍ତ ଅଞ୍ଚଳରେ ଗୁଳି ବାରୁଦର ବାସ୍ନା ନେଇ
ତେଣୁ ସାମ୍ନାସାମ୍ନୀ ହେବ
ଅତୀତର ଅସଂଖ୍ୟ କ୍ଷତାକ୍ତ ଏବଂ ବର୍ତ୍ତମାନର ସମୟ
ପରନ୍ତୁ ବିଶ୍ୱାସ ରଖ ନିଶ୍ଚେ ବେଦଖଲ ହେବ
ତୁମ ଶୂନ୍ୟର ଭବ୍ୟଲୋକ
ଏଥର କହିପାର ବିଚାରଗତ ଦୃଷ୍ଟିକୋଣ ହିଁ ଦର୍ଶନ ll