Library
ସିଦ୍ଧିଦାତ୍ରୀ
ସିଦ୍ଧିଦାତ୍ରୀ
କମଳ ଆସୀନା କେଶରୀ ବାହାନ
ମାତା ଅଷ୍ଟସିଦ୍ଧି ଦାତ୍ରୀ
ଅନ୍ତିମ ଦିବସେ ନବମ ରୂପରେ
ପୂଜାପାଅ ସିଦ୍ଧିଦାତ୍ରୀ ।
ଶଙ୍ଖ ଚକ୍ର ଗଦା ଅବ୍ଜ ସୁଶୋଭିତା
ତୁମ୍ଭ ଅନୁଗ୍ରହେ ଶିବ
ପାଇଥିଲେ ସିଦ୍ଧି ଜାଣିଛି ଜଗତ
ଅର୍ଦ୍ଧନାରୀଶ୍ୱର ମହାଦେବ ।
ନିର୍ବାଣ ଦାୟିନୀ ନିର୍ଗୁଣ ସ୍ୱରୂପା
ନିର୍ବାଣ ଚକ୍ରେକ ଧ୍ୟାନ
ନିର୍ବାଣ ନିମନ୍ତେ ସାଧକ ପୂଜିଲେ
ଅଚିରେ ଲଭେ ନିର୍ବାଣ ।
ଚଣ୍ଡମୁଣ୍ଡ ନାଶି ଶୁମ୍ଭନିଶୁମ୍ଭ ବିନାଶି
ମହୀ କରିଛ ଉଶ୍ୱାସ
ମହିଷା ନିପାତି ଦୈତ୍ୟକୁଳ ଧ୍ଵଂସି
କଲ ଦେବଙ୍କୁ ଅଶ୍ୱାସ ।
ଅଣିମା ମହିମା ଲଘିମା ଗରିମା
ପ୍ରାପ୍ତି ପ୍ରକାମ୍ୟ ଈଶିତ୍ଵ
ବଶିତ୍ଵ ଏ ଅଷ୍ଟ ସିଦ୍ଧି ହୁଏ ପ୍ରାପ୍ତ
ତୁମ୍ଭକୁ ପୂଜିଲେ ମାତ ।
ଦୁଃରହ ଦୁଷ୍କର କାର୍ଯ୍ୟ ହୁଏ ପୂର୍ଣ୍ଣ
ନଥାଏ ଆଉ ଅଗମ୍ୟ
ତୁମ୍ଭର ଭକତ ଲଭଇ ଅଭୀଷ୍ଟ
ନ ପାଏ ସେ ପୁନର୍ଜନ୍ମ ।
ତୁମ୍ଭ କୃପାମୃତ କରେ ଯେହୁ ପାନ
ଆନେ କିସ ପ୍ରୟୋଜନ
ସାଂସାରିକ ଇଚ୍ଛା ସ୍ପୃହା ରୁ ଉର୍ଦ୍ଧ୍ବରେ
କରେ ସେହୁ ବିଚରଣ ।
ଆହେ ଜଗଦ୍ଧାତ୍ରୀ ସିଦ୍ଧିଦାତ୍ରୀ ରୂପେ
ସର୍ବ ମନୋରଥ ପୂର୍ଣ୍ଣ କରି
ଜଗତ ମଧ୍ୟରେ ହେଲ ତୁମ୍ଭେ ଖ୍ୟାତ
ନାମ ହେଲା ସିଦ୍ଧେଶ୍ୱରୀ ।
ତୁମ୍ଭର ବିଭୂତି ଦେବେ ଅଗୋଚର
ନାହିଁ ଆଦି ନାହିଁ ଅନ୍ତ
ମହାମାୟୀ ତୁମ୍ଭ ମାୟାରେ ମୋହିତ
ହୁଏ ଏ ସାରା ଜଗତ ।
ଶକ୍ତି ପ୍ରଦାୟିଣୀ ଆରତ ନାଶିନୀ
ତୁମ୍ଭେ ମାତୃ ସ୍ୱରୂପିଣୀ
ଗରବ ଗଞ୍ଜିନୀ ଦୁଷ୍ଟ ନିବାରଣୀ
ତୁମ୍ଭେ ଶକ୍ତି ସ୍ୱରୂପିଣୀ ।
ତୁମ୍ଭ ଆଗେ ଛାର ଦେବତା ଆବର
ମୁଁ ଏକ ନର ପାମର
ପୁତ୍ର ପଣେ ତୁମ୍ଭ ଶରଣ ପଶିଲି
ମାର ଅବା ମୋତେ ତାର ।
ଆହେ ମହାଦେବୀ ତୁମ୍ଭେ କ୍ଷମାମୟୀ
ଜନନୀ ଧରିଲେ ଦୋଷ
ଅଧମ ଅବୋଧ ଶିଶୁ ଟି ର ଯଦି
ହେବ ସିନା ଅପଯଶ ।
ସନ୍ତାନ ତୁମ୍ଭର ନୁହଁ କି ମୁଁ ମାତା
ହୋଇପାରେ ନୀଚକୁଳ
ଜନନୀ ହୋଇ ବି କରୁଛ କି ତୁମ୍ଭେ
ସନ୍ତାନେ ବାଛବିଚାର ।
କରୁଣାମୟୀ ମା କରୁଣା କର ହେ
ତୁମ୍ଭ ପଦେ ରହୁ ମନ
ଏ ଜୀବନ ଅନ୍ତେ ମୋର ଏହି ଆତ୍ମା
ତୁମ୍ଭ ପଦେ ହେଉ ଲୀନ ।
