చావుకి చలేసింది
చావుకి చలేసింది
" చావుకి చలేసింది " - రాజేష్ ఖన్నా
==========================
ఆకలి చావులతో మనిషి అలమటిస్తుంటే
తీరని ఆకలికోసం మనసు పరితపిస్తుంటే
చలికి చావని మనిషి కోరికలు పరుగులెడ్తుంటే
మాంసం కప్పిన ఎముకలగూడు వణికిపోతుంటే
రూపంలేని మనసుకి మార్గాలేర్పడకుంటే
మనసుని చంపలేని చావుకి చలేసింది
మనిషి దేహానికి తప్పా మనసుకి చావులేదు
మత్తెక్కించే దారుల్లో మరణాన్ని లిఖిస్తూ
మనుషుల మధ్యా ప్రపంచశాంతిని జపిస్తూ
మనిషి దేహానికి అతుక్కొన్న తోలుపలకలకు
అద్దెరంగులకు,మెరుగులకు కాలం చెల్లకముందే
మనిషిని చంపేసే చావుకు చలేసింది
మనసుల్లేకుండా దేహాలతో బ్రతుకుతూ
ఆలోచనల్లేకుండా ఆశలతో కదులుతూ
మనుషుల్లోనే జీవచ్ఛవాలుగా నలుగుతూ
నవ్వులనటనతో పువ్వులు పూయిస్తూ
మర్మాలన్నీ దాచేసి మాయల గాలానికి
అమాయకుల్ని అతికించే మనుషుల్ని చూసి
చావుకి వణుకుపుట్టించేంతగా చలేసింది
మనసులో చిక్కటి చీకట్లని అతికించుకొని
ఒంటికి నాటకాభరాణాల్ని తగిలించుకొని
మనుషుల్ని మరబొమ్మలుగా మల్చుకొని
అధికారంకోసం మనస్సాక్షిని చంపుకొని
రాక్షసులుగా మారి సమాజాన్ని కరిగించుకొని
దాహం తీర్చుకొనే దుర్మార్గుల్ని చంపలేకా
చావలేని చలికి నిజంగానే చలేసింది
*****సమాప్తం******