જરૂરી છે
જરૂરી છે
જવાબો ય જરૂરી છે અહીં,
પ્રશ્નોને પણ કુંવારા રહેવું ક્યાં ગમે છે ?
ક્યાંક સજી છે મહેફિલ ને,
ક્યાંક મૌન પરિભાષા ઘડે છે.
શબ્દો પણ જરૂરી છે અહીં..
સર્જાય છે તુમુલ મનમાં એના થકી જ તો !
ચાહવા છતાં ઘણું ય રહી જાય,
વણચાહ્યું સતત રહે છે આસપાસ.
ખેવના એવી જરૂરી છે ઘણી..
આવે ઈચ્છિત હાથમાં અનાયાસ અમસ્તું ય !
ક્યાં ગમે છે આજકાલ બધું જગતે !
અણગમતું ગમાડવા મથે છે આજકાલ,
આવડત એવી જરૂરી ખરી કે,
જે પામીએ, પસંદ એને જ કરી શકીએ સરળથી !
હસ્તમેળાપે સાખ્ય અગ્નિનું રચાતું,
એ જ મંગળ કામના રહેતી નથી કાયમી,
હૂંફ પામતા રહેવી જરૂરી છે ભલા,
સકળ સફરે દામ્પત્યની, પામવા મંઝિલ મજાની !
વિચારોના વમળે વેરણ થતી આ નીંદર,
તો આવી જતી ઘણાંને પળમાં જ અવિલંબે,
રળવી પડે છે ઊંઘ એ પ્રસ્વેદ થકી,
ઝંખનાઓમાં વિચરવા, સ્વપ્નો તણી વિસાતે !
ઊઠે છે ઘણા સવાલો જવાબોની રાહમાં,
થઈ પડે છે ખુદ સવાલ એ જવાબો અલગ છે.
બની શકીએ કોઈકના ઉકેલ તો,
કોયડો થઈ આવતી વ્યથા નવ જીવશે જગતે !
જવાબો ય જરૂરી છે અહીં,
પ્રશ્નો ને પણ કુંવારા રહેવું ક્યાં ગમે છે ?