લીંબોળી
લીંબોળી
લીલી શી લીંબુડી ઝૂલે લીમડા ડાળ,
લીલુડી પાંદડીને વાયદા કર્યા બે ચાર !
તું ય લીલી ને છું હું ય લીલી છમ્મ,
આવ કરીએ મજા મારી સાથે તું રમ !
વર્ષાની હેલીમાં ભિંજાશું થઈ ભેળાં,
આમ કહી પાંદલડીની સુધારતી એ વેળા !
પણ આવ્યું જ્યાં ચોમાસુ ચારે કોર,
લીંબોળી થઈ ઘેલી વર્ષાની પ્રીતે ઘનઘોર !
એક જ છાંટાની સોબત વળગી એની ઓર,
ફટાક દઈ ને રંગ બદલતી લીંબોળીની કોર !
વિસરી વાયદા કેરી ફોરમ એ પીળી ચકોર,
છતાં મરક મરક મલકે પાંદલડી નવ કરે શોર !
નથી કહેવું વસમું મારે નથી મૂકવું કોઈ આળ,
હું ભલી ને ભલી છે મુજને સંઘરતી આ ડાળ !
ભલે થઈ તું પીળી મૂકી મુજ ને લીલી લોલ,
ના બદલું હું આ રંગ પ્રીતનો છે મારે હૈયે મોલ !
લીલી શી લીંબુડી ઝૂલે લીમડા ડાળ,
લીલુડી પાંદડીને વાયદા કર્યા બે ચાર !