કુંવારી ગઝલ
કુંવારી ગઝલ
યાદ એની જિંદગીમાં તો સહેવાતી નથી.
કોઇ કારણ તો કહો, એ કેમ ભૂલાતી નથી?
સાવ કુંવારા ગઝલ ને ગીત રાખ્યા છે અમે,
હું નથી ગાતો અને લ્યો, એ ય પણ ગાતી નથી.
દર્દ છાતીનું લઈને ક્યાં સુધી ફરતો રહું,
કોઇ આગળ જ્યાં કથા આખી કહેવાતી નથી.
ને સદા રડતી રહી આંખો ય મારી તે છતાં,
છાપ તાજી છે સનમની, સ્હેજ ધોવાતી નથી.
છે વિરહમાં કેટલું ઘાયલ છતાં ધડકે હજી,
દિલ તણી આ અવદશા મુજથી ય જોવાતી નથી.
કેટલી કડવાશથી કાગળ લખ્યો'તો એમણે,
આટલા વર્ષો પછી પણ ઉધઈ ખાતી નથી.
જીતશું નક્કી પ્રણયના જંગમાં, વિશ્વાસ છે,
આ "કમલ"ને હાર તો આમેય પોસાતી નથી.