ಇಳೆ‌ ಕಾಯುತಿದೆ ಮಳೆ

ಇಳೆ‌ ಕಾಯುತಿದೆ ಮಳೆ

ಬರಡು ಬದುಕಿಗ್ಹೊಳೆಯಾಗಿ

ಸುರಿದು ತಣಿಸು ಬಾ ll

ನಿನ್ನ ಮುತ್ತಿನಾ ಹನಿಯು

ಒಡೆದ ಎದೆಯ ಒಳಗೆ ಹನಿಸಿ l

ಆಳವಾದ ಪ್ರೀತಿ ಬೇರು

ಇನ್ನೂ ತನುವಮನವ ಬೆರೆಸಿ

ಮಿಲನವಾಗು ಬಾ ll            llಪll

ಪ್ರತೀ ಪ್ರೀತಿಯಾ ಹನಿಯು

ಮಣ್ಣಿನಲ್ಲೇ ಹದವ ಕಲೆಸಿ l

ಕಾಯುತ್ತಿರುವ ಹಸಿರ‌ ಕನಸು

ಸೃಷ್ಟಿಶೀಲ‌ ದೃಷ್ಟಿಯಿಂದ

ಚಿಗುರುವಂತೆ ಮಾಡು ಬಾ ll      llಪll

ಬೆಂದ‌ಒಡಲು ತಣಿಯುವಂತೆ

ಒಡಲ‌ ಬಗೆದು ಹನಿಯಬೇಕು l

ಎದೆಯ ಆಳಕ್ಕಿಳಿದು ಬೇರು

ಗಂಧಪುಷ್ಪ ಅರಳುವಂತೆ

ಎದೆಯ ತಣಿಸು‌ ಬಾ ll          Ilಪll

ಹಸಿರು ಉಸಿರ ಕಾನಮೌನ

ಭೂಮಿಯೆದೆಗೆ ಸಿಂಚನ l

ಜಗಕೆ ಸೊಗದ ಜೀವಗಾನ

ಮಳೆಯ ಹನಿಯ ಮುತ್ತಿನಾ

ಹೊನಲ ಹರಿಸು ಬಾ ll          Ilಪll

ಇಳೆ‌ ಕಾಯುತಿದೆ ಮಳೆ

ಬರಡು ಬದುಕಿಗ್ಹೊಳೆಯಾಗಿ

ಸುರಿದು ತಣಿಸು ಬಾ ..ll