കവിത:നഷ്ടബാല്യങ്ങൾ.രചന:ബിനുR

കുട്ടിയും കൊലുമായി മാവിൻചുവട്ടിൽ

അച്ചാരംപിച്ചാരം വേർത്തൊട്ടി

നടന്നൊരു ബാല്യകാലം വന്നെൻ

കൺചിമിഴിൽ മുത്തമിടവേ,

ഓർക്കുന്നു ഞാൻ,മൊബൈലിലെ

വെട്ടിത്തിളക്കത്തിൽ കണ്ണുകൾ കളയുന്നൊരിന്നത്തെ ബാല്യം.

ചിലമ്പിട്ടൊരൊച്ചയുമായ് കൂട്ടുകാരു-

മൊത്തുപുളിയനുറുമ്പുകളെ

തേച്ചൊട്ടിച്ചു

മാവിൻകൊമ്പുകളിൽ ഊയാലാടി

നടന്നൊരു കുട്ടിത്തങ്ങൾ ആർക്കുണ്ടിപ്പോൾ!

ഇന്നത്തെ കുട്ടിത്തങ്ങൾക്കു സ്വപ്നം

കാണാൻ പോലും കഴിയാത്തൊരു

നഷ്ടവസന്തങ്ങൾകണ്ടു കൺമിഴിപ്പൂ!

പച്ചപ്പാടവരമ്പിൽ ഒറ്റക്കാലിൽ

തപസ്സുചെയ്യും വെള്ളാരംകൊറ്റിയെ

ഒരുനൊടിയിടനേരംകൊണ്ട്

ഒറ്റപ്പരന്നകല്ലിനാൽ മൂളിപ്പറപ്പിച്ച്

കഴുത്തോടിച്ചു വീഴ്ത്തിയിരുന്നോരു

ബാല്യകാലംഓർത്തെടുക്കാനാകുമോ

ഇന്നത്തെ ബാല്യമേ..!

ഒഴുകുന്നപുഴയുടെ വെള്ളികിലുക്കം

കണ്ടുകൺനിറഞ്ഞാഴത്തിലേക്കൂളിയിട്ടു-

പോയ ഇരയോടുച്ചേർന്നചൂണ്ടയിൽ

മീൻ കൊത്തിവലിക്കവേ,ഉയരുന്ന

ഹൃദയമേളം അറിഞ്ഞിട്ടുണ്ടാവുമോ

ഇന്നത്തെ ബാല്യമേ..!

ചുടുവേനലിൽ പുഴയുടെ നടുവിൽ

മണൽപ്പരപ്പുകുഴിച്ചതിൽ

നിറയുന്നവെള്ളത്തിൽ മുങ്ങിക്കുളിച്ചകാര്യങ്ങൾ

പറഞ്ഞാലും അറിയാതെ,

കാര്യങ്ങളിൽകൺമിഴിക്കുന്നവർ,

തുള്ളികളായ് വീഴുന്ന ഷവറുകൾക്ക്

കീഴെ കുളിച്ചു തോരുന്നവർ,

അവർക്കറിയുമോ ആ മനസ്സിൻ കുളിർമ്മ!

കാലമെല്ലാമിനിയുമുരുളുമെങ്കിലും 

ഇന്നത്തെ ബാല്യം

ഇനിവരും തലമുറയ്ക്കായ് ഈ

രസച്ചരടിൻ വർണ്ണമനോഹാരിത

ആർക്കാനും വർണ്ണിക്കാനാമോ! കൊത്തങ്കല്ലുകളിലെ

ഉരുളൻകല്ലുപോൽ ഉരുണ്ടുമറിഞ്ഞമ്പേതെറ്റിച്ചൊറ്റ-

തിരിഞ്ഞുപോയോരോർമ്മക്കാലം

വന്നുനിന്നു ചിരിക്കുന്നു,കരയുന്നു

എൻമണ്ഡലങ്ങളിൽ!