खेळ सावल्यांचा (भाग ४ )
खेळ सावल्यांचा (भाग ४ )
मागच्या भागात आपण बघितले सुयोग ला झोपेत कोणी स्पर्श करत आहे . त्याच्या केसातून त्याच्या चेहऱ्यावरून कोणीतरी हात फिरवत आहे .
जेव्हा तो डोळे उघडून बघतो तेव्हा समोर तिला पाहून घाबरतो .
" तू . तू इथे काय करते ." असे बोलत सुयोग ने तिला बाजुला केले पण ती त्याच्या पायथ्याशी येऊन बसली हे बघताच सुयोग फारच घाबरला व तिला हात जोडून जाण्याची विनवणी करू लागला .
ती त्याच्याकडे बघत हसली व निघून गेली .
सुयोग ने एक नजर वेदिकाकडे टाकली तर ती गाढ झोपेत होती . त्याने अनामिकाच्या रूममध्ये पण खिडकीतून डोकावून बघितले ती पण झोपलेली होती .
दोघींना झोपलेले बघून सुयोग ने सुटकेचा श्वास सोडला .
बरं झाले वेदिका झोपलेली आहे तिने जर आपल्याला बघितले असते तर काय झाले असते . या भीतीने तो खुप गोंधळून गेला .
सकाळी वेदिका लवकर उठली काम आवरत सुयोग चा टिफिन तयार केला .
सुयोग . ये उठ आठ वाजले . तुला ऑफिसला जायला वेळ होईल म्हणत ती त्याला उठवू लागली .
आठ वाजले ऐकताच तो उठून बसला . रात्रीला आपल्या सोबत घडलेली घटना त्याला दिसू लागली . त्याच्या चेहऱ्यावर एक भीतीचे सावट दिसत होते .पण त्याने वेदिकाला कळू न देता तिला एक स्माईल देत आंघोळीला निघून गेला .
तयार होऊन जेव्हा तो ऑफिसला जायला निघाला तेव्हा त्याने वेदिका ला विचारले .
' अनामिका अजून उठली नाही का '?
अनोळखी जागेमुळे तिला कदाचित रात्री झोप लागली नसेल म्हणून ती आता गाढ झोपलेली आहे .
बरं ठीक आहे म्हणत तो कामावर निघुन गेला .
घड्याळाकडे बघत अनामिका ताडकन उठून बसली . अहो ताई नऊ वाजले मला आवाज तर द्यायचा ना
अंग लई कणकण करत आहे त्यामुळे रात्री उशिरा झोप लागली . म्हणून जागचं नाही आली . अनामिका कण्हतचं बोलली .
अग मी तुला मुद्दामच उठवले नाही वाटलं झोपू द्यावं थोडा वेळ .
काय ग तूला बरं वाटत नाही का असे म्हणत वेदिका तिच्या जवळ गेली अंगाला हात लावून बघितला तर तिला चांगलाच ताप होता .
ती उठून फ्रेश झाली व स्वतःची साडी नेसली .बरं ताई निघते मी आता आणि हो पुन्हा तुमचे खुप खुप आभार .
" ये तू कुठे निघालीस .तुझं अंग इतकं तापाने फणफनले
आणि तू निघाली . तुला बरं वाटेपर्यंत अजिबात कुठे जायचं नाही ."
अहो ताई मी तुम्हाला एकच रात्रीचा आसरा मागितला होता . आता तुम्ही मला जाऊ द्या .
तू मला ताई म्हणते ना मग माझं ऐकणार नाही का .
तुला बरं वाटलं की मग तू जा मी तुला थांबवणार नाही .
वेदिकाने तिला तापाची गोळी आणून दिली व आराम करायला सांगितले .
इकडे सुयोग खुप टेन्शनमध्ये होता . तो सकाळपासून अपसेट होता त्याला ऑफिसमधल्या काही लोकांनी विचारले पण . काही नाही म्हणून तो त्याला टाळू लागला .
त्याच्या चेहऱ्यावर कसला तरी तणाव दडपण दिसत होते .न राहवून त्याचा मित्र विकास परत त्याच्याकडे आला .
सुयोग . असा दोनदा आवाज दिला . का रे काय झालं तुला तू इतका अपसेट का आहे घरी काही झाले का
वेदिका ठीक आहे ना, असे प्रश्न त्याने सुयोग ला केले .
काही नाही रे रात्री झोप झाली नाही त्यामुळे थोडं डोकं दुखतंय बाकी काही नाही .
अरे मग घरी जाऊन आराम कर ना .
हम्म
त्याला अनामिका चा तो सुंदर चेहरा डोळ्यासमोर दिसत होता .जणू तो तिच्या मोहातच पडला . व दुसरीकडे रात्रीला घडलेल्या घटनेने तो चिंतेत पडला होता .
ते स्वप्न होते की मलाच भास झाला होता .
वेदिका घरी एकटीच असते तिला याबद्दल सांगायला हवं की नको ? असा सारखा विचार त्याच्या मनात यायचा .
कामावर त्याचं अजिबात लक्ष लागत नव्हते . त्याला वेदीकाची काळजी वाटू लागली .
त्याने ऑफिसमधून सुट्टी घेऊन घरी गेला व दार वाजविणारचं तितक्यात ……
(क्रमशः)