ଅଦାଲତ
ଅଦାଲତ
ଲଙ୍କାର କଟକେ ବିଚାର ବିଭ୍ରାଟ
ଚାଲୁଥାଏ ବ୍ୟଭିଚାର
ବଳର ପ୍ରୟୋଗେ ଜାନକୀ ହରଣ
ରାବଣର ଅଧିକାର ।
ଶୋଇ ରହିଥାଏ ଭାଇ କୁମ୍ଭକର୍ଣ୍ଣ
ଦଉଡଇ ମାୟାମୃଗ
କରେ ଅଟ୍ଟହାସ୍ୟ ଧରି ଛଦ୍ମବେଶ
ସଇତାନ ପଢେ ବେଦ ।
ଅକ୍ଷୟକୁମାର ନାଗଫାଶ ବନ୍ଧେ
କି°କର୍ତ୍ତବ୍ୟ ହନୁମାନ
ଲଙ୍କା ଅଦାଲତ ବିଚାର ବିଳମ୍ବେ
ଅଗ୍ନି ହୁଏ ପ୍ରଜ୍ଜ୍ୱଳନ ।
ବାନ୍ଧି ସେତୁବନ୍ଧ ବାନର ଭଲ୍ଲୁକ
ଆସନ୍ତି ଲକ୍ଷ୍ମଣ ରାମ
ହୁଏ ଦର୍ପ ଚୂର୍ଣ୍ଣ ରାବଣ ନିଧନ
ଧର୍ମ ହୁଏ ସ°ସ୍ଥାପନ ।
ପୁତ୍ର ଇନ୍ଦ୍ରଜିତ ନିକୁମ୍ଭିଲା ଯଜ୍ଞ
ହୁଏ ନାହିଁ କେବେ ସିଦ୍ଧି
ଲକ୍ଷ୍ମଣ ବୀରଙ୍କ ଦିବ୍ୟ ଅସ୍ତ୍ର ଘାତେ
ଛିନ୍ନ ହୁଏ ମୁଣ୍ଡଗଣ୍ଡି ।
ଧରମ ଦୁଆର ଉଚ୍ଚ ଅଦାଲତେ
ହୋଇଥାଏ ସୁବିଚାର
ସତ୍ୟ ପ୍ରତି ନିଷ୍ଠା ରଖିଲେ ଅବଶ୍ୟ
କରନ୍ତି କୃପା ଈଶ୍ୱର ।
ଲୀଳାମୟ ପ୍ରଭୁ ଶ୍ରୀ ପୁରୁଷୋତ୍ତମ
ଯୁଗେ ଯୁଗେ ଅବତରୀ
ବିନାଶ କରନ୍ତି ପାପ ଓ କଳଙ୍କ
ଧରମ ନିକିତି ଧରି ।
ଜୟ ଜଗନ୍ନାଥ ପତିତପାବନ
ଜୟଜୟ ରାମକୃଷ୍ଣ
ମୁଖରିତ ହେଉ ଗଗନପବନ
ଶୁଭନାମ ସତ୍ୟ ପୁଣ୍ୟ ।