ଭାବନା

ମନ ଅଗଣାରେ କେତେ ଯେ ଭାବନା ନୀରବରେ ଭାସିଆସେ

କବୀ ପରାଣ ମୋ ସାଧା କାଗଜରେ ଶବ୍ଦେ ଛବି ଆଙ୍କି ବସେ ।

କଲମ ମୁନରେ ରଙ୍ଗୀନ ଭାବନା କମନୀୟ ରୂପ ଦିଶେ

କେତେ ଭାବନାକୁ ଆଙ୍କି ମୁଁ ପାରେନା ଶବ୍ଦମାଳ କାହିଁ ରୁଷେ ।

କେତେ ଯେ ଭାବନା ବିଜୁଳିର ସମ ଫେରିଯାଏ ନିମିଷକେ

ଗଢିପାରେ ନାହିଁ ସୃଜନୀର ନୀଡ଼ ବେଦନା ଭରଇ ବୁକେ ।

କେତେ ଭାବନାକୁ ହୃଦୟ କନ୍ଦରେ ଅବରୁଦ୍ଧ କରି ରଖେ

କର୍ମ ବ୍ୟସ୍ତତାରୁ ସମୟ ସାଉଁଟି ଭିନ୍ନ ଭିନ୍ନ ରଙ୍ଗ ମାଖେ ।

ହସକାନ୍ଦ ଭରା ନାନା ଭାବାବେଗ ଅନୁଭବ ଅନୁଭୂତି

ଶବ୍ଦରେ ସଜାଏ ପ୍ରଫୁଲ୍ଲ ଚିତ୍ତରେ କେତେ ତିକ୍ତ ମିଠା ସ୍ମୃତି ।

କେବେ କଳ୍ପନାରେ କେବେ ବାସ୍ତବରେ ଭାବନାର କ୍ଷିପ୍ରଗତି

ପ୍ରୀତି ପ୍ରଣୟର ଅବ୍ୟକ୍ତ ଭାବନା କଲମରେ ଭରେ ଶକ୍ତି ।

କବି ଜୀବନର ଇପ୍ସିତ ବିଭବ ଭାବନା,କଲମ ,ଶବ୍ଦ

ଭାବନାର ଆତ୍ମଲିପି ସୃଜନୀକା ପାଠକକୁ କରେ ମୁଗ୍ଧ ।