ପାର୍ବଣ ମହତ୍ବ
ପାର୍ବଣ ମହତ୍ବ
ଆହେ ନୀଳ ଗିରି -ବୃତ୍ତେ
ଆହେ ଭଗବତୀ
ତୁମ୍ଭ ଗଳାରେ ମନ୍ଦାର ଶୋଭା ଜ୍ୟୋତି
ଆହେ ଭଗବତୀ !
ତୁମରି ମଣ୍ଡପେ ଭକ୍ତ ଗଣ
ଆନନ୍ଦେ ଲଗାଇ ଚିତ୍ତ ମନ
ତୁମ ପାଇଁ ମାତ ପାର୍ବଣ ମହତ
ଅବତୀର୍ଣ୍ଣେ ହେଉ ଦୁଃଖ ଇତି
ଆହେ ଭଗବତୀ !
ସିଂହ ପୃଷ୍ଠେ ମାଗୋ କର ବିଜେ
ଶକ୍ତି ସ୍ବରୂପିଣୀ ବଳ ବୀର୍ଯ୍ୟେ
ଆଗମନ ଶୁଣି ଶରତ ହସୁଛି
ଆଶ୍ଵିନେ ଲିଭାଅ ଶତୃ ଭୀତି
ଆହେ ଭଗବତୀ !
କାଶତଣ୍ଡି ଫୁଲ ବନ୍ଧ ବାଡେ
ଆଲଟ ଚାମର ସତେ ଝାଡେ
ଦୁର୍ବାଦଳ ମନ ପୁଲ୍ଲକିତ ଆଜି
ତୁମ୍ଭ ପାଦେ ରଖି ଲୟ ମତି
ଆହେ ଭଗବତୀ !
ଉଦ୍ଭାସିନୀ ଦୁର୍ଗା ନାମ ଶୁଣି
ନୃତ୍ୟ ରତ ନାଦେ ଖୋଳ ଗିନି
ଗନ୍ଧ ଧୂପ ଦୀପ ସଜ ହେଲେ ମାତ
ମନେ ଧ୍ୟାୟୀ ତୁମ ଯଶ କୀର୍ତ୍ତି
ଆହେ ଭଗବତୀ !
ଶିବ ପୁତ୍ର ଲକ୍ଷ୍ମୀ ବିଷ୍ଣୁ ହର
ଦେବୀ ଦର୍ଶନକୁ ତରବର
ବେଦ ହସ୍ତେ ବ୍ରହ୍ମା ମଣ୍ଡେପେ ଉଠିଲେ
ନାରଦ ଜପିଲେ ତୁମ୍ଭ ସ୍ତୁତି
ଆହେ ଭଗବତୀ !
ମଙ୍ଗଳ ବାଦ୍ୟରେ ଜଗ ହସେ
ସତେ କି ପିୟୁଷ ସୁଧା ବର୍ଷେ
ଭକତ ଗହଳି ପଡେ ହୁଳହୁଳି
ଆହାଃ କି ଆନନ୍ଦ ଆତ୍ମା ତୃପ୍ତି ।
ଆହେ ଭଗବତୀ !
ପୁଷ୍ପାଞ୍ଜଳି ହସ୍ତେ ସ୍ବର୍ଗ ଦେବ
ତୁମ୍ଭ ପାଦ ପଦ୍ମେ ରଖି ଭାବ
କୁସୁମ ବୃଷ୍ଟିରେ ଆନନ୍ଦ ଲଭନ୍ତି
ପୁଲ୍ଲକିତେ ଧରା କେତେ ଶାନ୍ତି
ଆହେ ଭଗବତୀ !
କିଏ ସେ କହିବ ଜନ୍ମ ମୃତ୍ୟୁ
ରଖିବ ଆଜି ମା ପୂଜା କ୍ରତୁ
ପାପ ତାପ ନାଶି ଲିଭାଇବ ଦୁଃଖ
ପ୍ରଭାତୀ ମନରୁ ପୋଛି ଭ୍ରାନ୍ତି ।
ଆହେ ଭଗବତୀ !