ଥାନାକୁ ଯିବୁ କିଆଁ
ଥାନାକୁ ଯିବୁ କିଆଁ
ଝିଅ ଜନମରେ ମାଆକୁ ହଟହଟା
କରୁନେ କି ?
ଗାଳି ଗଂଜଣାର ଅପଶୋରା ସ୍ମୃତି
ମନେ ରହୁନି କି?।୧।
ଝିଅ ପ୍ରତି ସ୍ନେହ ଆଦର ପୁଅ ସହ
ସମାନ ହେଉଛି କି ?
ପୁଅ ଓ ଝିଅ ଏକ ସାଙ୍ଗେ ବୁଲିଲେ
ଗାଳି ତାକୁ ଦେଉନି କି ? |୨|
ଝିଅ ଘରୁ ରାତିରେ ବାହାରକୁ ଗଲେ
ଡର ଲାଗୁନି କି ?
ପୁଅ ରାତିରେ ବାହାରକୁ ଗଲେ ସେ
ଭାବନା ଆସୁଛି କି ? |୩|
କଲେଣି ୭୭ ତମ ସ୍ୱାଧୀନତା ଦିବସ
କୁ ଆମେ ପାଳନ
ସ୍ବପ୍ନକୁ ଦବାଇ କର୍ତ୍ତବ୍ୟକୁ ଦେଉନେ
କି ପ୍ରାଧାନ୍ୟ ? ।୪।
ବେଶଭୂଷା ହେଉ କିମ୍ବା ତାର ସରବ
ଇଚ୍ଛା ପ୍ରବଣତା
ନାରୀ ଭୋଗୁନି କି ଏବେ ସରବ ପ୍ରକାର
ବନ୍ଧନ ଓ ପରାଧୀନତା ? ।୫।
ତାକୁ ଦେବୀ ଭାବେ ସରବେ କରୁନେ
କି ବର୍ଣ୍ଣନା ?
ପୂଜା ପେଣ୍ଡାଲରେ ତାକୁ ସଜାଉଛେ
ଖାଲି ସିନା ।୬।
କୁହେ ତ ଆମେ, ନାରୀ ଆଜି ସବୁଠି
ହେବ ଆଗୁଆ
ଅତ୍ୟାଚାର ହେଲେ ତାକୁ ଦୋଷ ଦିଏ
ଆମେ କିଆଁ ? |୭|
ଲୁଚା କଥା, ତୁ ଟିକେ ଦବି ଯା, ଚୁପ
ରହି ଯାଆ,
କଥାଟା ଠିକ ହେଇଯିବ, ଥାନା କଚେରୀ
କୁ ଯିବୁ କିଆଁ ? ।୮।