ಅಮ್ಮ

ನವಮಾಸಗಳು ಉದರದಿ ಹೊತ್ತು 

ಕಾಪಾಡುತ ಜತನದಿ ಜೀವದ ಸೊತ್ತು 

ಜನ್ಮವ ನೀಡುವಳು ಈ ತಾಯಿ 

ಜಗನ್ಮಾತೆ ಸ್ವರೂಪಿಣಿ ನಮ್ಮ ಕಾಯಿ 

ಮಮತೆಯ ಕಡಲು ಆರೈಕೆಯಲಿ 

ದಿನರಾತ್ರಿ ಮಗುವ ಪೋಷಿಸುತಲಿ 

ಕಂದನ ಕರೆಗೆ ಓಗೊಟ್ಟು 

ಕಾಯುವಳು ಕಣ್ಣಲಿ ಕಣ್ಣಿಟ್ಟು 

ಮಗುವಿನ ತೊದಲು ನುಡಿಗಳಲಿ 

ದಿನವಹಿ ಆಟ ಪಾಠಗಳಲಿ 

ತುತ್ತನು ನೀಡಿ ಮಲಗಿಸುತ ಲಾಲಿಯಲಿ 

ಮೀರಿಸುವಾರು ಅಮ್ಮನ ತ್ಯಾಗದಲಿ 

ಸಂಸಾರಕೆ ಹೆಗಲನು ಕೊಡುತಿಹಳು 

ಗಂಡಿಗೆ ಸಮನಾಗಿ ದುಡಿದಿಹಳು 

ದಣಿವನೇ ಅರಿಯದ ಯಂತ್ರದ ತರದಿ 

ಮರೆವಳು ತನ್ನನೇ ಮನೆಯನು ಪೊರೆಯುವ ಭರದಿ 

ತಾಯಂದಿರಿಂದಲೇ ಸಮಾಜದ ಔನ್ನತ್ಯ 

ಇರಲಿ ಸದಾ ಅಮ್ಮಂದಿರ ಸಾಂಗತ್ಯ 

ಉದರದೊಳಿಟ್ಟು ಹಡೆದ ಜೀವಕೆ 

ಹೃದಯದೊಳಿಟ್ಟು ಪೂಜಿಸುವ 

ಕಣ್ಣಿಗೆ ಕಾಣುವ ದೇವರು ಇವಳೇ 

ಪ್ರತಿದಿನವೂ ಅಮ್ಮನಿಗೇ ಅರ್ಪಿಸುವ