ನಂದಾದೀಪ
ನಂದಾದೀಪ
ಜನುಮವ ನೀಡುವ ತಾಯಿಯ ಪ್ರತಿರೂಪ
ಅವಿರತ ಸಲಹುವ ತಂದೆಯ ಬಾಳ ದೀಪ
ಅನುಜ ಅನುಜೆಯರಿಗೆ ಮಮತೆಯ ರೂಪ
ಮಗಳೇ ಮನೆಮನ ಬೆಳಗುವ ನಂದಾದೀಪ
ಜನಿಸಿದ ಮನೆಯಲಿ ದೀಪವ ಹಚ್ಚಿಸಿ
ಮೆಟ್ಟಿದ ಮನೆಯ ಮನೆತನ ಬೆಳಗಿಸಿ
ಮಕ್ಕಳ ಬಾಳಿನ ದಾರಿಯ ದೀಪ
ಸಹಿಸುವಳು ಸಂಸಾರದ ಬವಣೆ ತಾಪ
ಪ್ರೀತಿಯ ತೈಲವ ದಿನವೂ ಸುರಿದು
ದುಡಿವಳು ಬದುಕಲಿ ಮೈಯನು ಮುರಿದು
ಬೆಳಗಿಹಳು ಮನೆಯ ಜೀವನ ಜ್ಯೋತಿ
ಕಷ್ಟಗಳ ಮೆಟ್ಟಿ ಮುನ್ನಡೆವ ಛಾತಿ
ತಾನುರಿದು ಜಗವ ಬೆಳಗುವ ರೀತಿ
ಕಷ್ಟವ ಸಹಿಸುವ ತ್ಯಾಗದ ಮೂರ್ತಿ
ಪ್ರೀತಿ ವಾತ್ಸಲ್ಯವ ಬೀರುವ ಬೆಳಕು
ಸಾರುವ ಮಹಿಮೆಯ ಹೇಳುತಾ ಬಹುಪರಾಕು