ಖಾಲಿ ಮನಿ

      

ಪುಣ್ಯವಂತರ ಹೊಟ್ಟಿಯಾಗ ಹೆಣ್ಣು ಕೂಸು

ಹುಟ್ಟುತಾದ ತಂದಿಯ ಕಷ್ಟ ಕಳಿತಾದ ಮಗಳಾ 

ಪುಣ್ಯವಂತಿ ನೀ ಹುಟ್ಟಿ ಅರಮನಿಯನೆ ನನಗ

ಕಟ್ಟಿ ಕೊಟ್ಟು ಹೋಗಿದಿ ನೀ ಬಿಟ್ಟು ದೂರ ಮಗಳಾ

ನನ್ನ ಕೂಸು ಗಂಡನ ಮನಿಗಿ ಹೋದ ಮ್ಯಾಗ

ಮಾಸಿ ಹೋಗ್ಯಾದ ಅರಮನಿಯ ಅಂದ

ಒಳ ಹೊರಗ ನಡಿವಾಗ ಅವಳ ಹೆಜ್ಜಿ ಗುರುತು

ನೆನಪಾಗುತಾವ ನಂಗ ಭಾಳ ಕಾಡುತಾವ

ಸೀಮೆಯ ದಾಟ್ಯಾಳ ವರುಷವೆ ಕಳೆದಾಳ

ಬಡವನ ಗುಡಿಸಲಲಿ ರಾಣಿಯಂಗ ಬಾಳತಾಳ

ಹಡೆದಪ್ಪನನ್ನೇ ಯಾಕೋ ಅಕಿ ಮರೆತಾಳ

ಬಂದು ಕರೆದರೆ ತವರಿಗೆ ನಾವಲ್ಲೇ ಎನುತಾಳ

ಮನಿಯಾಗ ನೂರು ಮಕ್ಕಳು ಕೂಡಿ ಆಡಿದರೇನಾ 

ನನ್ನ ಮಗಳಂಗ ಅವರಾಗುತಾರೇನಾ ಮಗಳಾ

ನೋವನ್ನು ನುಂಗಿದಿ ಖುಷಿಯನ್ನು ಹಂಚಿದೆ

ತವರ ಮನಿಗಿ ಕೀರ್ತಿ ತಂದಿರುವೆ ನನ್ನ ಮಗಳಾ

ಮಗಳಿಲ್ಲದ ಮನಿಯಾಗ ನಾ ದಿನ ಹೆಂಗ ಕಳೆಯಲಿ ಖಾಲಿ ಗೂಡಾಗ್ಯಾದ ನಿನ್ನ ತವರ ಓ ಮಗಳಾ

ನೀ ಬಂದೊಮ್ಮೆ ಸಂತೈಸು ಈ ಹಿರಿ ಜೀವವನ್ನ

ಮರಿಬ್ಯಾಡ ಕೂಸಾ ಜೀವ ಇಟ್ಟಾದ ನಿನಮ್ಯಾಗ