बळीराजा

प्रतिक्षा पावसाची करितो

बळीराजा आज हताश आहे

बरसेल कधी वरूणराजा

व्याकुळ नजरेने वाट पाहे १

पेरणी मी कशी करू देवा

पाऊस काही पडत नाही

रान सगळे ओसाड झाले

देवराजा आता तुच पाही २

झोपडीत अन्नाचा कण नाही

अस्तुरी माझी आहे उपाशी

सावकार सारे झाले गब्बर

खाती एक एक घास तुपाशी ३

देवा बरसू दे पाऊस धारा

तवा पिकतील शेतातून मोती

घर दार माझं मग सुखी होईल

चमकतील नयनांच्या ज्योती ४

जादा काहीच नको मजला

नको कोपूस वरूण देवा

असावा बळीराजा सुखात

देई त्यास आनंदाचा ठेवा  ५

बघ आयुष्य संपलं माझं राबताना

आता डोळे वर लावून बसलो

आस मजला देवा आहे कृपेची

पडता पाऊस मनात हरखलो ६

जादा काही देवा मागण नाही

मेघराजाची किरपा व्हावी

पिकं डोलावी वावरामंदी

एवढीच दया देवा करावी  ७