पदर मायेचा
पदर मायेचा
तिच्या मायेचा पदर
कधी फाटतच नाही
तिचे कोकरावरचे प्रेम
कधी अटतच नाही
नऊ महिने वाहिलेला
गर्भ भार तिला वाटतच नाही
शी शू ने भरलेल्या दुपटी अन् लंघोटांची
घृणा मनी कधी दाटतच नाही
तिच्या मायेचा पदर कधी फाटत च नाही ||१||
खोड्या आणि मस्तीची
त्रस्तता कधी भेडसावत च नाही
लेकराला तळहातावरील फोडाप्रमाणे जपताना
ती कधी थकतच नाही
तिच्या मायेचा पदर कधी आटत च नाही ||२||
बोबडे बोल असो वा भांडून उच्चारलेले अपशब्द
तिचे कान कधी किटतच नाही
कल्याणम् अस्तु च्या अशिषांची माळ
जपता हात थांबतच नाहीत
तिच्या मायेचा पदर कधी फाटत च नाही||३||
लेकरांच्या सुदृढ यशस्वीतेसाठी
देवाकडे मागणं संपतच नाही
दातृत्वच जाणणारा हा मायेचा स्पर्श
कधी कठोर काटेरी होतच नाही
तिच्या मायेचा पदर
कधी विरतच नाही
तिचे लेकरावरचे प्रेम कधी आटत च नाही ||४||