ହାତଲେଖା ଚିଠି
ହାତଲେଖା ଚିଠି
ତୁମେ ଦେଇଥିବା ହାତଲେଖା ଚିଠି
ସାଇତି ରଖିଛି ଆଜି ବି ସାଥି
ପ୍ରେମର ସନ୍ତକ ସାଜିଥିଲା ବୋଲି
ନୀରବେ ପଢୁଛି ପ୍ରତିଟି ରାତି ।
ଦେଇଥିଲ କେତେ ମିଠା ପ୍ରତିଶୃତି
ଶବଦେ ବିଶ୍ୱାସ ଭରସା ଦେଇ
ହାତ ଧରି ବାଟ ଚାଲିବା ନିଇତି
କହୁଥିଲ ପ୍ରୀତି ଗୀତିକା ଗାଇ ।
ମିଛ ପ୍ରେମ ଖେଳ ହେଇଗଲା କାଳ
ଆଉ କା' ସହିତ ସଂସାର ଗଢି
ବାଲିଘର ମୋର ଭାଙ୍ଗିଦେଲ କାହିଁ
ପାରିବି କେମିତି କୁହ ତ ଯୋଡି ।
ତୁମ ପ୍ରତାରଣା ଜଳାଉଛି ହିଆ
ଆଖିରୁ ଝରୁଛି ବେଦନା ଝର
ସ୍ୱାର୍ଥ ପ୍ରୀତି ବୋଲି ବୁଝିପାରିଲିନି
ତୁଟିବା ଆଗରୁ ସମ୍ପର୍କ ଡୋର ।
ନିର୍ଜନରେ ବସି ସ୍ମୃତି ତୀରେ ହଜି
ହସୁଛି ଦୁଃଖକୁ ଗୋପନ ରଖି
ହୃଦୟର ବ୍ୟଥା କେମିତି ସହୁଛି
ନିର୍ଜନ ରଜନୀ ରହିଛି ସାକ୍ଷୀ ।