କାଗଜ ଡ଼ଙ୍ଗା
କାଗଜ ଡ଼ଙ୍ଗା
କାଗଜ ଡଙ୍ଗାରେ
ଯାଆ ଭାସି ଦୂରେ
ବରଷା ର ସୁଅ ସାଥେ।
ଆସିଛି ଶ୍ରାବଣ
ଆଣିଛି ସନ୍ଦେଶ
ଜଗି ବସିଛି କେ ପଥେ ।
ଆକାଶ ଆଖିରୁ
ଝରିପଡ଼େ ଲୁହ
ବରଷାର ବିନ୍ଦୁ ସାଜି ।
କାହା ବିରହରେ
କିଏ ସେ ଝୁରୁଛି
କୋହରେ ଯାଉଛି ଭିଜି ।
ଲକ୍ଷେ ତାରା ମଧ୍ୟେ
ଦ୍ଵିତୀୟା ଜହ୍ନଟା
ଲାଗେ କିଆଁ ଫିକା ଫିକା ।
ହୃଦୟ କନ୍ଦରେ
ଯନ୍ତ୍ରଣା ଭରିଛି
ଅନୁଭବେ ଏକା ଏକା ।
ନେଇଯା ସନ୍ଦେଶ
କୁମୁଦିନୀ ପାଶେ
ବିରହରେ ଭିଜା ଚିଠି ।
ସରସୀର ଜଳେ
ବ୍ୟଥା ଭରା ମନେ
ଚାହ୍ନି ଥିବ ନଭେ ଉଠି ।
ଭାସିଯାଆ ମୋର
କାଗଜ ଡଙ୍ଗାରେ
ରିମ ଝିମ ବର୍ଷା ତାଳେ ।
ଭେଟି କୁମୁଦିନୀ
ଭୁବନ ମୋହିନୀ
ନୀଳ ସରସୀର ଜଳେ ।