ରଜର ଖଞ୍ଜ
ରଜର ଖଞ୍ଜ
ରଜପର୍ବ ଆସିଅଛି
ବର୍ଷକୁ ଥରେ
ମୌସୁମୀର ବିନା ମନ
ଭିଜେନା ବାରେ ।
ଉଦଣ୍ଡ ତପତ ସାଥେ
ମନ ଉଲ୍ଲାସ
ଖେଳିଯାଏ ଚାରିଆଡେ
ଆନନ୍ଦ ହର୍ଷ ।
ମହମହ ବାସ ଘୁରେ
ପୋଡ଼ ପିଠାରେ
ଖିଲିପାନ ଉଠଭରେ
ନାଲି ରଙ୍ଗରେ ।
ସଂସ୍କୃତିରେ ଫେଣ୍ଟାଫେଣ୍ଟି
ଆଧୁନିକତା
ପରମ୍ପରା ଲୁଚିଯାଏ
ହଜୁଛି ସତ୍ତା ।
ପିଠାପଣା ଧୀରେ ଧୀରେ
ଉଠିଗଲାଣି
କେକ୍ ବିରିୟାନୀ ଏବେ
ଜାଗା ନେଲେଣି ।
ଆମ୍ବ ବରଗଛ ନାହିଁ
ଘର ପାଖରେ
ସିଡ଼ିଘରେ ବନ୍ଧା ଦୋଳି
ଝିଅ ଜିଦିରେ ।
ଚାଷୀପାଇଁ ବରଷା ତ
ସାତ ସପନ
କୋଇଲି ପାଇଁ ନାହିଁ
ବକୁଳ ବନ ।
ସ୍ୱାର୍ଥପର ହିଂସା ଦ୍ୱେଷ
ପିଛା ଛାଡ଼ୁନି
ବିଦେଶୀ ପରମ୍ପରା
ନୂଆ କାହାଣୀ ।
ତଥାପି ବଂଚିଛି ରଜ
ସଜ ମଉଜ
ଧରଣୀର ପୂଜାପରା
ମନରେ ହେଜ |