ଶାଶ୍ବତ ପ୍ରେମ

ପ୍ରେମ ତ ନୁହଁଇ ମାଟିର କଣ୍ଢେଇ

ପଡିଗଲେ ଭାଙ୍ଗିଯିବ,

ପ୍ରେମ ନୁହେଁ ପୁଣି ବାଲିଘର ଟିଏ

ପବନରେ ଉଡିଯିବ।

ନୁହେଁ ପୁଣି ସେହି ଝରା ଶେଫାଳିଟେ

ଅକାଳରେ ଝଡିଯିବ,

ପ୍ରେମ ଅର୍ଥ ନୁହେଁ ସୁନା ରୁପା ଧନ

କିଏ ଚୋରି କରି ନେବ ।

ପ୍ରେମ ଚିରନ୍ତନ ପ୍ରେମ ଯେ ଶାଶ୍ବତ

ପ୍ରେମ ସତ୍ଯ ସୁନ୍ଦର,

ନଥାଏ ଯା ପାଶେ ସ୍ବାର୍ଥାନ୍ଧତା ପୁଣି

ନାହିଁ ଗର୍ବ ଅହଂକାର ।

ପ୍ରେମ ତ ଗୋଟିଏ ପ୍ରୀତି ନିର୍ଝରିଣୀ

ପ୍ରତିକ୍ଷଣେ ଝରୁଥାଏ,

ଚଲାପଥେ ଯେତେ ପଡୁ ପଛେ କଣ୍ଟା

ଫୁଲ ସମ ଲାଗୁ ଥାଏ ।

ପ୍ରେମର ଫଗୁଣ ଛୁଇଁ ଦେଇଗଲେ

ପୃଥୀ ଲାଗେ ସ୍ବର୍ଗ ସମ,

ସମର୍ପଣ ଭାବ ଯହିଁ ରହିଥାଏ

ଅଟେ ସେ ଶାଶ୍ବତ ପ୍ରେମ ।