ସମ୍ପର୍କ
ସମ୍ପର୍କ
ବିବାହ କରିକି ସମ୍ପର୍କ ରଖିଲି
ଶ୍ଵଶୁରଙ୍କ ଘରେ ମୁହି
ବିବାହ କାଳରେ ଖୁସି ହେଉଥିଲି
ଦୁଇ ପରିବାର ଚାହିଁ।
ସମୟର ସ୍ରୋତ ବଡ଼ ବଳବାନ
ଆଜି ମୋ' ଆଖିରେ ଲୁହ
କହି ହେଉଛି ନା ସହିବା ସମ୍ଭବ
ମରୁଅଛି ଅହରହ।
ମୃତ୍ୟୁର କୋଳରେ ଶୋଇପାରୁ ନାହି
ମୋହରେ ବନ୍ଧା ମୋ' ଦେହ
ମୁକ ପରି ଆଜି ମଉନ ରହିଛି
ଲୁଚାଇ ଲୁହ ଓ କୋହ।
ବଧିର ସଦୃଶ ବଞ୍ଚିବାକୁ ଆଜି
ସମୟ କହୁଛି ମୋତେ
ଏମିତି ମଣିଷ କେ'ଅଛ ସଂସାରେ
ଘର ପରିବାର ହିତେ।
ସବୁ ଦେଖୁଅଛି ଘଟୁଅଛି ଯାହା
ସାମ୍ନାରେ ମୋହର ନିତି
ଅନ୍ଧର ସଦୃଶ ପଡ଼ି ରହିଅଛି
ଦେହ ଓ ମନରେ ଭିତି।
ଜନ୍ମଦାତା ବାପା ଏ କୁଳରେ ମୋର
ଧର୍ମର ଶ୍ଵଶୁର ସେଠି
ଉଭୟେ ଶତ୍ରୁ ମୋ' ହୋଇଗଲେ ଆଜି
ରହିବାକୁ ନାହିଁ କୋଠି।
ଏ କୁଳରେ ଭାଇ ସେ କୂଳରେ ଶଳା
ଉଭୟେ ଦିଅନ୍ତି ମାଡ଼
ପିଠିରେ ଚାଲନ୍ତି ଏହି ଦେହଟାକୁ
ମିଶାଇବେ ଦେଖି ଗାଢ଼।
ପତ୍ନୀ ପୁତ୍ର କନ୍ୟା ସାତପର ସଦା
ନିଜର ସ୍ୱାର୍ଥରେ ଯାଇ
କହି ପାରୁଛି ନା ସହି ମୁଁ ପାରୁଛି
ଅନ୍ଧ ଓ ବଧିର ହୋଇ।
ତାଲା ପଡ଼ିଅଛି ପାଟିରେ ମୋହର
ଫିଟିବାକୁ ବଳ କାହିଁ
ସମ୍ପର୍କର ଜଉଘରେ ଆଜିକାଲି
ତଥାପି ବଞ୍ଚିଛି ଚାହିଁ।
ସ୍ୱାର୍ଥରେ ସ୍ୱାର୍ଥରେ ସମ୍ପର୍କ ରହିବା
ଯଦି ଯୁଗେଯୁଗେ ଅଛି
କାହିଁକି ଈଶ୍ଵର ଜନ୍ମ ଦେଇଅଛ
ମଣିଷ ଜାତିରେ ବାଛି।
ପ୍ରେମର ସମ୍ପର୍କ ଧର୍ମର ଜୁଇରେ
ଆଉ ରଖନାହି ତୁମେ
ସମ୍ପର୍କ ତୁଟାଇ ହଟାଇ ଦିଅନ୍ତୁ
ଏଇ ଶରୀରକୁ ଧାମେ ।