അവൾ

രാവുദിക്കും മുൻപേ

സൂര്യനെ പോലും

പിൻതള്ളി ഉണർന്നവൾ 

ഏറെ വൈകി നിദ്രയെ 

പുൽകുന്നവൾ.

മഞ്ഞ് പെയ്യുമാ രാവിലും 

കുളിച്ചീറനണിഞ്ഞു ദീപം

തെളിയിച് നെറ്റിയിൽ

കളഭ കുറിയണിഞ്ഞവൾ.

തൻ പ്രാണനാഥനെ മൃദു

സ്പർശത്താൽ തഴുകിയു-

ണർത്തിയവൾ അവനായി

 മോഹങ്ങൾ ത്യജിച്ചവൾ.

എന്നിട്ടുമവളെ തട്ടിമാറ്റിയവൻ

പാഞ്ഞു തൻ ജീവിതം വെട്ടി-

പ്പിടിക്കാൻ തൻ മോഹങ്ങൾ നേടാൻ.

അവന്റെ മൃദു സ്പർശനം 

ഇരുളിൽ മാത്രമൊതുങ്ങുമൊരു 

വഴിപാടായി പരിണമിച്ചതവളും 

തിരിച്ചറിഞ്ഞു.

ദർപ്പണത്തിൽ തൻ വദനം

തെളിഞ്ഞവൾ കണ്ടതിൽ 

തൻ സീമന്തരേഖയിലെ രക്തവർണം.

ഇതൾ കൊഴിഞ്ഞ തൻ ജീവിത

വസന്തമൊരു തീരാനോവായിയ-

വളിൽ ശേഷിച്ചു.

 

തൻ പങ്കാളി തൻ ഉടമയായി 

മാറിയ നിമിഷത്തിൻ സ്മരണയിൽ 

അവളുടെ മിഴികളിൽ തോരാ 

അശ്രു ഒഴുകി ധാരയായി.

 

പുക തുപ്പുമാ മുറിയുടെ 

ഓരത്തു അവളുടെ കരങ്ങൾ 

തൻ കർത്തവ്യങ്ങൾ തിരിച്ചറി-

ഞ്ഞതിൽ മുഴുകി മൗനമായി.