ବିଶ୍ଳେଷଣ
ବିଶ୍ଳେଷଣ
1 min
213
ଜୀବନର ପଥ
ଲମ୍ବା ତ ବହୁତ
କେତେ ଖାଲ କେତେ ଢିପ,
ଅଙ୍କାବଙ୍କା ପୁଣି
ଗଡ଼ାଣି ଉଠାଣି
ଆସେ କେତେ କେତେ ଛକ ।
ଜଣା ରାସ୍ତା ଯେତେ
ଚାଲିଛୁ ବା କେତେ
ତା' ଠାରୁ ବେଶି ଅଜଣା ,
ଅଜଣା ଯେତିକି
ଆସିଲେ ଦୋ'ଛକି
ବୁଦ୍ଧି ହୁଏ ବାଟବଣା ।
କେଉଁଠି ସ୍ବର୍ଗକୁ
କେଉଁଠି ନର୍କକୁ
ଅସରନ୍ତି କେଉଁ ବାଟ ,
ଦୋ'ଛକିରେ ଛିଡ଼ା
ମନ ରାଜା ଘୋଡ଼ା
କେଉଁଠି ପଡ଼ିବ ହାଟ ।
ଦୋ'ଛକିର ଛନ୍ଦ
ଆଣେ ସିନା ଦ୍ବନ୍ଦ୍ବ
ହାଟ ବେଳ ଯାଏ ଗଡ଼ି,
ସରି ଗଲେ ହାଟ
ବୁଦ୍ଧିର କବାଟ
କିଳି ଯିବ ତାଲା ପଡ଼ି ।
ହୁଏ ଦୋ'ଦୋ' ପାଞ୍ଚ
ଆସି ଯିବ ସଂଜ
ଘଡ଼ିକେ ଛୁଟୁଛି ଘୋଡ଼ା,
ଆଗକୁ ଦି'ପାଦ
ବଢ଼େଇଲେ ପାଦ
ଦୋ'ଛକି ପଡ଼ୁଛି ଆଡ଼ା ।