ଲୁଚିଛି ନା ଗୋଡ଼ ଦି'ଟା ଦିଶୁଛି
ଲୁଚିଛି ନା ଗୋଡ଼ ଦି'ଟା ଦିଶୁଛି
କୁଆଁରୀ ବୟସେ କାଉଁରି କନ୍ଯା ମୁଁ
ନୁଆଣିଆଁ ଚାଳ ଘରେ ,
କାମାକ୍ଷା ନଗରେ ଭୁଆସୁଣୀ ହେଇ
ଭୁଆଙ୍କୁ ଆପଣା କରେ ।
କୁଣିଆଁ ଆସିଲେ କଣେଇ ଚାହେଁ ମୁଁ
ଅଣେଇ ଓଢ଼ଣା ଫାଙ୍କେ ,
ରସିକ ଦେଖିଲେ ରସବତୀ ସାଜି
କଥାରେ ଫେଣେଇ ଡାକେ ।
ଶାଶୁ ଶ୍ବଶୁରଙ୍କ ପାଦୁକା ପାଉଛି
ସତିଆ ପାଖରେ ସତୀ ,
ବାରମାସେ ତେର ବ୍ରତ , ଉପବାସେ
ଚାଲି ଥାଏ ଚୋରାପ୍ରୀତି ।
ଗୃହଲକ୍ଷ୍ମୀ ସାଜି ଲକ୍ଷ୍ମୀ ପୂଜା କଲେ
ନଣନ୍ଦ ନଇଁକି ଚାହୁଁଛି ,
କୁଳବୁଡ଼େଇଏ କଳେଇ କୁହନ୍ତି
ଲୁଚିଛି ନା ଗୋଡ଼ ଦିଶୁଛି ।
ଚୋର ମାଅା କାନ୍ଦେ ଆଖି ମଳି ମଳି
ଢଳି ଢଳି ଚାଲେ ଚୋରଣୀ ,
କିମ୍ଭୀର କାନ୍ଦଣା କାନ୍ଦୁଛି ନିଶାଡ଼ି
ଭାଟିରେ ହଜେଇ ଘରଣୀ ।
ବଢ଼ିଲା ଝିଅଟା ବଳେ ଉଡ଼ି ଗଲା
ବଳେଇ କାନ୍ଦୁଛି ଜନନୀ ,
ଢୁଳାଉ ଢୁଳାଉ ଶୋଇ ଯିବ ବୋଲି
ବାପ କହେ ଜମା ଜାଣିନି ।
ବୁଲି ବୁଲି ବନ୍ଧ୍ୟା ସନ୍ଧ୍ୟା ଆଗମନେ
ସନ୍ଦେହ କରେ ପୌରୁଷ ,
ବନ୍ଧ ଭାଙ୍ଗି ଗଲେ ବିଧବା ବ୍ରାହ୍ମଣୀ
ବିଧିରେ ପାଳୁଛି ହବିଷ ।
ବାଧା ଦିଏ ରାଧା କୃଷ୍ଣ ନାମ ଶୁଣି
ଚନ୍ଦ୍ରସେଣା ଜଗି ବସିଛି ,
ଲଳିତା, ବିଶାଖା ଖତେଇ ହୁଅନ୍ତି
ଲୁଚିଛି ନା ଗୋଡ଼ ଦିଶୁଛି ।
ମୁନିବ ମାନେନି ମାନ ଅଭିମାନ
ବୁଣି ଚାଲେ ଶାଗ ମନ୍ଦା ,
କିରାଣି ଚାହୁଁଛି କଣେଇ କଣେଇ
ଚପରସୀ ମାଗେ ଚାନ୍ଦା ।
ବଡ଼ବାବୁ ବଡ଼ ଅଡ଼ୁଆ ରେ ପଡ଼ି
ଖୋଜଇ ନେତାଙ୍କ ଆଶ୍ରୟ ,
ବଟିରେ ବଟିରେ ବଟୁଆ ପୁରେଇ
ନେତାଏ ଦିଅନ୍ତି ଅଭୟ ।
ମନ୍ତ୍ରୀଙ୍କ ଘରଣୀ ଯନ୍ତ୍ରୀ ସାଥେ ମିଶି
ଯନ୍ତ୍ର ରେ ତନ୍ତ୍ରକୁ ହାଣୁଛି ,
ମୁରୁଖ ଜନତା ମଳୁଖ ଚୋବେଇ
ଧାନ ବିକି ମାନ କିଣୁଛି ।
ସରକାର କହେ ସ୍ବଚ୍ଛ ପ୍ରଶାସନ
ନିର୍ମଳ ଶାସନ ଚାଲିଛି ,
ଧରା ପଡ଼ି ଗଲେ ବିରୋଧି କୁହନ୍ତି
ଲୁଚିଛି ନା ଗୋଡ଼ ଦିଶୁଛି ।