ଧନୁ ସଂକ୍ରାନ୍ତି
ଧନୁ ସଂକ୍ରାନ୍ତି
ବାରମାସ ବାର ରାଶିରେ ଚଳନ
ରାଶି ଅନୁସାରେ ନାମ ,
ସେ ରୂପେ ଚଳନ ସୂର୍ଯ୍ୟନାରାୟଣ
ଅନୁରୂପେ ଧରା ଧାମ ।
ସଂକ୍ରାନ୍ତିରୁ ମାସ ଆରମ୍ଭ ହେଇକି
ମାସାନ୍ତରେ ହୁଏ ଶେଷ ,
ଗ୍ରହ, ଚନ୍ଦ୍ର, ତାରା, ନକ୍ଷତ୍ର ବଦଳେ
ବଦଳେ ରାତ୍ରି ଦିବସ ।
ବିଛା ପରେ ଧନୁ ସଂକ୍ରାନ୍ତି ଆସଇ
ପୌଷ ମାସକୁ ନେଇ ,
ଶୀତ ଆଗମନେ ଶିଶିର ହସଇ
କଅଁଳ ଖରା ଖୋଜଇ ।
ଧାନ ଲକ୍ଷ୍ମୀ ବିଜେ ଘରେ ଘରେ ସେ ଯେ
ମାର୍ଗଶୀର ମାଣେ ମାଣେ ,
ଚଢ଼େ ବସାରେ ଧାନ ଗଡ଼ୁଥାଏ
ପୌଷର ଆଗମନେ ।
ଗୁଡ଼ିଆଣୀ କରେ ଯତନେ ଶ୍ରଦ୍ଧାରେ
ଧନୁମୁଆଁ ଖଇ ଭାଜି ,
ଧନୁ ସଂକ୍ରାନ୍ତିର ବଡ଼ି ଭୋର୍ ରୁ
ଶ୍ରୀମନ୍ଦିର ଯିବ ପୂଜି ।
କାଉ କା' କା' ରାବିବା ଆଗରୁ
ଲାଗି ହେବ ଆଦ୍ୟ ଭୋଗ ,
ପବିତ୍ର ପୌଷେ ପୁଷ୍ୟାଭିଷେକରେ
ଭିଡ଼ ଶ୍ରୀମନ୍ଦିର ଆଗ ।
ପଞ୍ଜିକାର ମାନେ ଧନୁ ସଂକ୍ରାନ୍ତିକୁ
ମହୋଦରୀ ବୋଲି କହି ,
ପିଲା ଠାରୁ ବୁଢ଼ା ରକ୍ତ ବର୍ଣ୍ଣି ବସ୍ତ୍ରେ
ଉତ୍ସବେ ମାତନ୍ତି ଯାଇ ।
କିମ୍ବଦନ୍ତୀ କହେ ଦ୍ବାପର ଯୁଗରେ
ମଥୁରା କଟକ ବାସୀ ,
ମହାଆଡ଼ମ୍ବରେ ପାଳୁଥିଲେ ସର୍ବେ
ବଣ୍ଟାବଣ୍ଟି ହେଇ ଖୁସି ।
କଂସ ଡାକି ଥିଲେ କୃଷ୍ଣଙ୍କୁ ମଥୁରା
ଧନୁଯାତ୍ରା ଦେଖିବାକୁ ,
ଭାବି ମନେ ମନେ ଶେଷ ବଇରୀକୁ
କୌଶଳେ ମାରିବାକୁ ।
ସେଥିପାଇଁ କାଳେ ବରଗଡ଼ ପାଳେ
ଧନୁଯାତ୍ରା ମହା ପର୍ବ ,
ବିଶ୍ବ ପ୍ରସିଦ୍ଧ ଏ ମୁକ୍ତ ରଙ୍ଗମଞ୍ଚ
ଓଡ଼ିଶାର ଗୌରବ ।
ମୁଆଁରେ ମୁଆଁରେ ମୁହଁ ମିଠା କରେ
ଓଡ଼ିଆଣୀ ଫଟା ଓଠେ ,
ଫୁଲେଇ ମକର କାଟୁଛି ଚକର
ଆସିବାକୁ ନଈ ତୁଠେ ।