ତୋ କୋଳ ଚାହେଁ

ଅସହାୟ ନିରୂପାୟ କି ଖେଳ ଖେଳେ ସମୟ

କର୍ତ୍ତବ୍ୟରେ ପୂର୍ଣ୍ଣତା ନାହିଁ ମୋର ତୋ' ପାଇଁ

ହେ ଈଶ୍ବର କାହିଁକି ଏ ଦଣ୍ଡ ସ୍ନେହ ପାଇବାକୁ

କାନ୍ଦୁଛି ଦୂରେଥାଇ ମୁଁ ଇଛା ମୋର ହସିବାକୁ,

ତୋ' କୋଳର ଉଷୁମ ପରଶ କାମ୍ୟ ମୋର

ଆହା କି ଆନନ୍ଦ ଶାନ୍ତି ସେ କୋଳେ ଶୋଇବାର

କଷ୍ଟହୁଏ ଏ ଦୂରତା ଓ ଏକାକୀର ନୀରବତା

ପଣତ ହିଁ ତ ତୋର ଦିଏ ବଞ୍ଚିବାର ଏକାଗ୍ରତା,

ତୋର ମୁଖ ଦେଖି ପ୍ରତିଦିନ ପାଇବାକୁ ସୁଖ

ପରିସ୍ଥିତିର ବାଧକତା ଓ ଶୂନ୍ଯତା ଏ ମନର

ଜଟିଳତା ଜୀବନର ଇଏ ସରଳତା ସବୁମିଛ

ତୋ' ହସ ହିଁ ତ ମୋର ମୂଳବିନ୍ଦୁ ହସିବାର, 

ବାରବାର ମନେପଡ଼େ ଅଜାଣତେ ଲୁହଝରେ

ଏ ଦୂର୍ଭାଗ୍ୟ ଅବା ଈଶ୍ବର ଇଚ୍ଛା ଏହି ଦୂରତାର

କ୍ଷମା ଚାହେଁ ଅଯୋଗ୍ୟପଣ ପାଇଁ ମୋ' ବୋଉ

ଏହି ଦୂରତ୍ବର ଶଙ୍କା ଯଥାଶୀଘ୍ର ଦୂରେଇ ଯାଉ।