സന്ദേശമോ അദൃശ്യം - അമ്മ
സന്ദേശമോ അദൃശ്യം - അമ്മ
നിഴലിനിരുട്ടിലേക്കവളോ മറയവെ,
ഇരുൾ മൂടിയടഞ്ഞൊരാ ചിമ്മിനിയിൽ
നിന്നുതിരുന്ന പുകച്ചുഴിയിലവളോ
പ്രതിബിംബം കാൺകെ;
കഥയിലെ വ്യാഖ്യാനത്താളുകളിലവളോ
നായിക പരിവേഷത്തിനനർഹയെ-
ന്നറിയെ, തെല്ലും പരിഭവമില്ലാതിരുന്നവൾ
പതിയെ നിഴലിലേക്കുള്ളൊരാ
ദൂരത്തെ അളക്കവെ,
പരാജിതയല്ലാത്തൊരാ പരാജിത-
യാണന്നറിയെ : നിശ്ശബ്ദയായ്
ഇപ്രകാരമൊരു സ്വകാര്യമെൻ
കാതിൽ പതിയെ: എൻ ജീവിതവുമൊരു
മാതൃകയാണു പൈതലെ , സ്ത്രീത്വവും
സ്വത്വവുമില്ലാത്തൊരാ സ്ത്രീജീവിതം;
എന്നിലെ പരാജയം നിന്നിലെ
നേട്ടമെന്നറിയുമ്പോൾ ഞാനോ
വിജയത്തിൻ കരം പുൽകും;
ഞാനോ നിൻ മാതൃത്വത്തിൻ
കാവലാൾ…