ଶ୍ମଶାନ ର ଡାକ
ଶ୍ମଶାନ ର ଡାକ
(ପୁଲ୍ ୱମା ଶହୀଦଙ୍କ ସ୍ମୃତି ଉଦ୍ଦେଶ୍ୟରେ)
ମୋ କୋଳରେ ଆସି ଶୋଇବାକୁ ତୋତେ
କିଏସେ ଦେଲାରେ ଅନୁମତି ?
କରୁଣ ସ୍ୱରରେ ଡାକୁଛି ତୋ ମା'
ଗଡାଉଛି ଲୁହ ଦିନରାତି ।
ସୀମାରେ ପହରା ଦେବାପାଇଁ ସିଏ
ପଠାଇଥିଲା ଯେ ତୋତେ
ଉଠିଯା ଧନରେ ନିଦ ଭାଙ୍ଗି ଏବେ
ଅପନିନ୍ଦା ହେବ ମୋତେ ।
ଶୋଇବାର ବେଳ ନୁହେଁ ଏ ବାପରେ
ଆତଙ୍କବାଦ ଯେ ଉଠେ ମାତି
କେମିତି ସହିବେ ଦେଶବାସୀ ତୋର
ଘୋଟିଆସେ ଆଜି ଅମାରାତି ।
ଲଢ଼ିବା ପାଇଁ ତୁ ଜନମିଛୁ ପରା
ପଛଘୁଞ୍ଚା ନାହିଁ ତୋ ଜାତକେ
ଇଟା ର ଜବାବ ପଥରେ ଦେବାକୁ
ଆଜି ଏ ଭାରତ ମା' ଡାକେ ।
ଛାତିକୁ ଫୁଲାଇ ଏବେ ବି ବୁଲନ୍ତି
ଦେଶଦ୍ରୋହୀ କେତେ ବିଭୀଷଣ
ଏ ଘୋର ବିପଦେ ଶୋଇକି ପାରିବୁ
ନିଜକୁ କରିକି ତୁ ପାଷଣ ?
ବୀର ପୁଙ୍ଗବ ତୁ ଲଢ଼ିବା ତୋ ଧର୍ମ
ଗୁଳି ତୁ ସହିବୁ ଛାତି ପାତି
ରୋକି ପାରିବନି ତୋତେ ପରା କେବେ
ଏ ଦେଶର ହୀନ ରାଜନୀତି ।
ବାଟ ଭୁଲି ଚାଲି ଆସିଛୁ ଭାବି ମୁଁ
ଦେଲି ସିନା କୋଳେ ଯେ ଆଶ୍ରୟ
ଅମୃତ ସନ୍ତାନ ଚିର ଅମର ତୁ
ଏ ନୁହେଁ ତୋ'ର ଚିର ବିଦାୟ ।