ଗାଁ ଡାକୁଛି ଆ
ଗାଁ ଡାକୁଛି ଆ
ଗାଁ ଡାକୁଛି ଆରେ ମିତ,
ତତେ ଗାଁ ଡାକୁଛି ଆ
ସରଗ ସୁଖ ଏଇଠି ଅଛି,
କେଡେ ମିଠା ତା ନାଁ ।
ଏଇଠି ପରା ତୋ ଷଠିଘର,
କଟିଛି ଏଠି ବାଲ୍ୟ କୈଶୋର
ଶିଖିଛୁ ଚାଲି ଏଇ ମାଟିରେ,
ଏଇଠି ଅଛି ତୋ ଚାଳଘର ।
ବରଷା ଧାର ଗାଁ ଦାଣ୍ଡରେ,
କାଗଜ ନାଆ ଭାସି ଯାଏରେ
ଏନ୍ତୁଡ଼ି ତୋର ଜଳିଛି ଏଠି,
ସବୁ କଣ ତୁ ଭୁଲି ଗଲୁରେ ।
ଦରୋଟି କଥା ପ୍ରଥମ ଚାଲି,
ଚlଟଶାଳୀର ବସ୍ତାନୀ ଧରି
ଅବଧାନଙ୍କ ଆକଟ ବାଣୀ,
ମଣିଷ ହେଲୁ ମଣିଷ ପରି ।
ଆମ ଗାଁ ର କଇଁ ପୋଖରୀ,
ବର ଓହଳ ଡାଳମାଙ୍କୁଡ଼ି
ନଟିଆ ଅଜା ବାରିରୁ କୋଳି,
ଲୁଚାଉଥିଲେ ତା ବଙ୍କୁଲୀବାଡ଼ି ।
ସାଗୁଆ କ୍ଷେତ ଶୋରିଷ ଫୁଲ,
ଗାଈ ଗୋଠର ମୁରଲୀ ସ୍ଵନ
ସଞ୍ଜ ସକାଳେ ଚଉରା ମୂଳେ,
ଜେଜେମା ର ମଧୁର ଗାନ ।
ଆମ୍ବ ବଉଳ ମହୁଆ ନିଶା,
ଧାନ କିଆରୀ ମାଟିର ବାସ୍ନା
ମହ ମହ ବାସେ ବୋଉ ହାତ ବଢ଼ା,
ସକାଳୁ ସକାଳୁ ପଖାଳ କଂସା ।
ଭୋଦୁଅ ଦିନ ତାଳ ତମାଳ,
ବାଇଚଢେଇ ବସା ଓହଳ
ଚକୁଳିଆ ପଣ୍ଡା ତାର ତାଳ ଛତା,
ଧଡ଼ିଆ ଭାଇର ହଳ ଲଙ୍ଗଳ ।
ଆମ୍ବ ତୋଟା ମାଳେ କୋଇଲିର କୁହୁ,
ଆମ ଗାଁ ଫୁଲ ବାସେ ମହୁ ମହୁ
ଲାଜ ଲାଜ ହସ ଓଢଣୀକୁ ଟାଣି,
ମିଠା କଥା କୁହେ ଆମ ଗାଁ ବୋହୁ ।
ବୋଉର କୋଳେ ଅଳି ଅଝଟ,
ବାପାଙ୍କର ସେ ମିଛ ଆକଟ
ଆଈର ଗପ ହସ ପସରା,
ମନରେ ଆଣେ ଆଜି ଉଚ୍ଚାଟ ।
ରଜ ପାନଖିଆ କେତେ ମଉଜ,
ଆମ ଗାଁ ଝିଅ ହୁଅନ୍ତି ସଜ
ଦୋଳର ଝୁଲଣ ଝୁଲେ ବିମାନ,
ଫଗୁ ଖେଳୁଥାନ୍ତି ରାଧା ମୋହନ ।
କୁଆଁର ପୁନେଇଁ ଚକାଜହ୍ନ,
ଉଚ୍ଛନ୍ନ କରଇ କୁଆଁରୀ ମନ,
ମଧୁଝରା ସେଇ ଜହ୍ନରାତି,
ହେଲାଣି ଏବେରେ ସାତ ସପନ ।
ଆମ ଗାଁ ନଈତୁଠ କାଚକେନ୍ଦୁ ପାଣି,
ସଂଜେଡରଲାଗେ ସେ ସିଜୁଗୋହରୀ
ଅଙ୍କା ବଙ୍କା କାଦୁଅର ଦାଣ୍ଡେ,
ଲାକ୍ଷାବୋଳା ପାଦ ପକାଏ କିଶୋରୀ ।
ଗାଁ ମୁଣ୍ଡରେ ଗ୍ରାମଦେବତୀ,
ସକାଳେ ସଂଜେ ପୂଜା ଆଳତୀ
ଭାଗବତଟୁଙ୍ଗୀରେ ନୀତିସଞ୍ଜବେଳାରେ,
ଭାଗବତ ଦୁଇପଦ ମନେଭରେ ଶାନ୍ତିରେ ।
ଏଠା ପାଣି ପବନ ସତେ ଅଛି ଜୀବନ,
ଆମ ମାଟି ମିଠା କଥା କହେ
ମୁଣ୍ଡିଆ ପାହାଡ଼ ଜିଅନ୍ତା ଲାଗଇ,
ଏଠି ପଥର ବି ଗୀତ ଗାଏ ।
ପଥର ଦେଉଳୁ ପଥର ଭିତରୁ,
ଜୁଳୁ ଜୁଳୁ ଦୁଇ ଆଖି
ଆମ ଭଲ ମନ୍ଦ ସୁଖରେ ଦୁଃଖରେ,
ରହିଥାଏ ହୋଇ ସାକ୍ଷୀ ।
ଆମ ଗାଁରେ ସୁନାଫଳେ ରୂପାଫଳେ,
ଏଠି ମାଣିକର ଦୀପ ଜଳେ
ଆଶାର ଚଢେଇଟିଏ ବାନ୍ଧଇ ବସା,
ଆମ ଗାଁ ସପନର ନଈ କୂଳେ ।
ଏସବୁ ଭୁଲି ତୁ ରହିଛୁ କାହିଁ,
ଏ ପରା ତୋର ଜନମଭୂଇଁ
ଜୀବନ ଗଢ଼ା ଏଇଠି ତୋର,
ଜଳିବ ଦିନେ ତୋହର ଯୁଇ ।
କୋଳେଇ ନେବ ଡାକୁଛି ଆ,
ଭୁଲିନି ତୋତେ ସେ ପରା ମା
ଶୀରକୁ ତୋର ନୁଆଇଁ ଦେ,
ଆରେ ମିତ ଆମ ଗାଁ ଡାକୁଛି ଆ ।