ଷଡ଼ଋତୁ
ଷଡ଼ଋତୁ
କଳ୍ପନା ନେତ୍ରରେ ଚିତ୍ର କ୍ୟାମେରାରେ
ମୁଖପଦ୍ମ ଯେବେ ଉଠେ ଭାସି
ଫଗୁଣ ଫଗୁଣ ଲାଗେ ରାତି ଦିନ
ମଧୁବାସ-ରାସ ମନେ ଆସି ।
ରାଗ ଅଭିମାନେ ବିରହ ଜ୍ୱଳନେ
ଦୂରେଇ ଶୋଇଲେ ପ୍ରୀୟ।
ଶ୍ରାବଣ ଶ୍ରାବଣ ଝରନ୍ତି କାରୁଣ୍ୟ
କ୍ଷତାକ୍ତ ରକ୍ତାକ୍ତ ହିୟା ।
କଟୁକ୍ତି ବକ୍ରୋକ୍ତି କଳି ମାଡ଼ ଯୁକ୍ତି
ଅକାଳେ ସକାଳେ ହେଲେ
ନିଦାଘ ନିଦାଘ ତତଲା ସଂଭାଗ
ନିରାଶା ରାଜୁତି ଚାଲେ ।
ପୁନେଇ ପରବେ ଭୋଜି ମହୁତ୍ସବେ
ନୂଆ ବେଶ ପରିପାଟୀ
ଶରତ ଶରତ ନିର୍ମଳ ପଣତ ନେତ
ଖୁସିଫୁଲ ନେସି ଲଲାଟି ।
ଭୋଜନ ବ୍ୟଞ୍ଜନ ପ୍ରସ୍ତୁତ ସେବନ
ସୁସ୍ଵାଦୁର ମୃଦୁ ଗୁଞ୍ଜରଣ
ହେମନ୍ତ ହେମନ୍ତ ଶ୍ଵେଦ ବିନ୍ଦୁ ଯେମନ୍ତ୍ର
ଚୂର୍ଣ୍ଣ କୁନ୍ତଳ କରେ ସମ୍ବରଣ ।
ନିରୋଳା ପ୍ରହର ବାହୁରେ ଆଦର
ଚୁମ୍ବନ ଚର୍ଚ୍ଚିତା ବିଭାବରୀ
ଶୀତୁଆ ଶୀତୁଆ କାମନା କିମିଆଁ
ପ୍ରଦୋଷେ ରମଣ ସୁଖାମ୍ବରୀ ।
ଷଡ଼ଋତୁ ଗୋରୀ ମହମ ବଲ୍ଲରୀ
ସ୍ଵାଦ ଦେଇ ଭିନ୍ନ ଭିନ୍ନ
ଜୀବନ ଯୌବନ ତାରୁଣ୍ୟ ଉଚ୍ଛନ୍ନ
ଆମ ପ୍ରେମ ଅତୁଲ୍ୟ ଅଭିନ୍ନ ।